இந்திய டி20 வரலாற்றில் புதிய சாதனை படைத்த சென்னை வீரர் சுரேஷ் ரெய்னா!

சென்னை சூப்பர் கிங்ஸ் அணி வீரர் சுரேஷ் ரெய்னா, இந்திய டி20 வரலாற்றில் நேற்று புதிய சாதனை படைத்தார்.
சேப்பாக்கம் மைதானத்தில் நேற்று நடந்த ஐ.பி.எல் டி20 போட்டியில், சென்னை சூப்பர் கிங்ஸ்-ராஜஸ்தான் ராயல்ஸ் அணிகள் மோதின. இந்தப் போட்டியில் சென்னை அணி 8 ஓட்டங்கள் வித்தியாசத்தில் வெற்றி பெற்றது.

• சென்னை சூப்பர் கிங்ஸ் அணி வீரர் சுரேஷ் ரெய்னா 32 பந்துகளில் 36 ஓட்டங்கள் எடுத்தார். இந்நிலையில் சுரேஷ் ரெய்னா இந்திய டி20 அரங்கில் புதிய சாதனைகளை படைத்தார்.

• இந்தியாவில் நடந்த டி20 போட்டிகளில் மொத்தம் 6 ஆயிரம் ஓட்டங்களை எட்டிய முதல் இந்திய வீரர் எனும் பெருமையை ரெய்னா பெற்றார்.

• தான் விளையாடியுள்ள 179 ஐ.பி.எல் போட்டிகளில், சென்னை அணிக்காக மட்டும் ரெய்னா 150 போட்டிகளில் விளையாடியுள்ளார். இதன்மூலம் சென்னை அணிக்காக அதிக போட்டிகளில் விளையாடிய வீரர் என்ற பெருமையை பெற்றார்.

• சமீபத்தில் டெல்லி அணிக்கு எதிரான போட்டியில், ஐ.பி.எல்-யில் 5 ஆயிரம் ஓட்டங்கள் அடித்த முதல் இந்திய வீரர் என்ற சாதனையை ரெய்னா படைத்தார்.

இதுவரை 179 ஐ.பி.எல் போட்டிகளில் விளையாடியுள்ள சுரேஷ் ரெய்னா 5070 ஓட்டங்களை எடுத்துள்ளார். இதில் ஒரு சதம், 35 அரை சதங்கள் அடங்கும்.

PTI