Slider

காணொளிகள்

மன்னார் செய்திகள்

விம்பம்

உள்நாட்டு செய்திகள்

சர்வதேச செய்திகள்

பல்சுவை

School events

கட்டுரைகள்

சினிமா

-

கிளிநொச்சியில் இரவு நேரங்களில் கடன் வசூலிக்கும் நிதி நிறுவனம்! மக்கள் விசனம்....


கிளிநொச்சியில் நிதி நிறுவனம் ஒன்று வறிய மக்களுக்கு வட்டிக்கு கடன்களை வழங்கி உள்ளது. பின்னர் அதனை அறவிடுவதற்கு நேற்றிரவு கடன் பெற்றுக்கொண்டவர்களின் வீடுகளுக்கு சென்று தகாத வார்த்தைப்பிரயோகங்களை மேற்கொண்ட சம்பவம் ஒன்று இடம்பெற்றுள்ளது.

யுத்தத்தினால் பாதிக்கப்பட்டு மீள்குடியேறிய மக்களுக்கு பல்வேறு நிதி நிறுவனங்கள் அவர்களது வீடுகளுக்கே சென்று அதிகூடிய வட்டிக்கு கடன்களை வழங்கி வருகின்றனர்.

கிளிநொச்சி பரந்தன், கால்ஏக்கர் பகுதியில் உள்ள மிகவும் வறிய குடும்பங்களுக்கு கிளிநொச்சியில் கிளைகள் எதனையும் கொண்டிருக்காத நிதி நிறுவனம் ஒன்று அதி கூடிய வட்டிக்கு கடன்களை வழங்கி வருகின்றது.

நேற்றிரவு இரவு 9.15 மணிக்கு குறித்த பகுதிக்கு மோட்டார் சைக்கிளில் சென்ற, நிதி நிறுவனத்தின் கடன் அறவீட்டாளர்கள் கடன்களை பெற்றவர்கள் மீது அவதூறான வார்த்தைப்பிரயோகங்களை மேற்கொண்டதுடன் அச்சுறுத்தியுமுள்ளனர்.

குறித்த கடன்களைப்பெற்ற குடும்பங்கள் உரிய முறைப்படி கடன்களைச் செலுத்தி வருவதாகவும் தற்போது தொழில் எதுவும் இல்லாததால் இந்த தவணைக்கட்டணத்தை அடுத்த தவணையுடன் சேர்த்து கட்டுவதாக தெரிவித்தபோதும், இரவு வேளையில் வந்து தமக்கு தொந்தரவு தருவதாக அம்மக்கள் தெரிவித்துள்ளனர்.

இரவு வேளையில் பெண் பிள்ளைகளையும் வைத்திருக்கும் பெண் தலைமைத்துவ குடும்பங்களாகிய தாம் சமுகத்தில் பல்வேறு பிரச்சினைகளுக்கு முகங்கொடுக்கும் அதேவேளை, தற்கொலை செய்ய வேண்டிய நிலை ஏற்படும் என்றும் பாதிக்கப்பட்டவர்கள் தெரிவித்துள்ளனர்.

இதேவேளை, கிளிநொச்சி மாவட்ட செயலகத்தில் நடைபெற்ற ஒருங்கிணைப்புக் குழுக்கூட்டம் மற்றும் பாதுகாப்பு விழிப்புணர்வு கூட்டம் ஆகியவற்றில் இவ்வாறு கடன் வழங்கும் நிறுவனங்கள் பிற்பகல் 5.00 மணிக்கு பின்னர் கடன்களை அறிவிடுவதற்கு வீடுகளுக்குச் செல்ல முடியாது என்றும் தெரிவிக்கப்பட்டது.

அத்துடன் இது தொடர்பாக மாகாண சபையில் கூட தீர்மானிக்கப்பட்டபோதும் இவ்வாறு கடன்களை அறவிடுவதற்கு இரவு 9.15 மணிக்குச் செல்வது தொடர்பாக பலரும் விசனம் தெரிவித்துள்ளனர்.

கிளி. முழங்காவில் பொலிஸ் நிலையம் பொது மக்களால் முற்றுகை!


கிளிநொச்சி முழங்காவில் பொலிஸ் நிலையம் பொது மக்களால் முற்றுகையிடப்பட்டு இன்று ஆர்ப்பாட்டம் ஒன்று மேற்கொள்ளப்பட்டுள்ளது.

300க்கும் மேற்பட்ட பொது மக்கள் நாச்சிக்குடா சந்தியில் இருந்து முழங்காவில் பொலிஸ் நிலையம் வரை பேரணியாக சென்று, பொலிஸ் நிலையத்தை முற்றுகையிட்டு ஆர்ப்பாட்டத்தில் ஈடுபட்டுள்ளனர்.


கடந்த 17ஆம் திகதி இரவு முழங்காவில் பகுதியில் மன்னாரில் இருந்து வந்த கார் மோதியதில் 13 வயதான அ.அபினேஸ் என்ற சிறுவன் படுகாயமடைந்த நிலையில் வைத்தியசாலையில் அனுமதிக்கப்பட்டிருந்தார்.

இந்நிலையில், குறித்த சிறுவன் சிகிச்சை பலனின்றி நேற்றைய தினம் உயிரிழந்துள்ளார். எனினும், விபத்தை ஏற்படுத்திய சாரதி காருடன் தப்பியோடியிருந்தார்.


அந்த காரின் இலக்கத்தகடு விழுந்து கிடந்த நிலையில், அதனை பொலிஸாரிம் ஒப்படைத்த சிறுவனின் உறவினர்கள் முறைப்பாடும் செய்திருந்தனர்.

எனினும், பொலிஸார் நடவடிக்கை எதுவும் எடுக்காத நிலையில், இன்றைய தினம் பொது மக்கள் பொலிஸ் நிலையத்தை முற்றுகையிட்டு ஆர்ப்பாட்டத்தில் ஈடுபட்டிருந்தனர்.

இந்நிலையில், சம்பவ இடத்திற்கு வருகைத்தந்த உதவி பொலிஸ் அத்தியட்சகர் சந்தேகநபரை கைது செய்வதற்கான நடவடிக்கை எடுக்கப்பட்டு வருவதாக தெரிவித்திருந்தார். இதனையடுத்து, போராட்டம் கைவிடப்பட்டிருந்தமை குறிப்பிடத்தக்கது.


பயங்கரவாத பிரிவினரின் அறிவித்தலையடுத்து வள்ளுவா் சிலைதாங்கியின் மாதிரி உலகத்தில் ஈழம் அழிப்பு

கிளிநொச்சி கரைச்சி பிரதேச சபை வளாகத்தில் அமைக்கப்பட்டுள்ள திருவள்ளுவா் சிலையை தாங்கியுள்ள உலக பட மாதிரி பீடத்தில் எழுதப்பட்டிந்த ஈழம் எனும் சொல் பயங்கரவாத பிரிவினரின் அறிவித்தலையடுத்த அழிக்கப்பட்டு்ளளது.
இது தொடா்பில் மேலும் தெரியவருவதாவது
கடந்த சனிக்கிழமை(17) கிளிநொச்சி கரைச்சி பிரதேச சபை வளாகத்தில் உலக தமிழ்ச் சங்கம் அன்பளிப்புச் செய்த திருவள்ளுவா் சிலை திரை நீக்கம் செய்யப்பட்டது.
திருவள்ளுவரின் திருக்குறல் உலக பொது மறை என்பதனால் திருவள்ளுவரின் சிலையை உலகத்தின் மீது இருப்பது போன்று சிலை தாங்கியை வடிவமைக்க கிளிநொச்சி தமிழ்ச் சங்கம் தீர்மானித்து அதன்படி உலக நாடுகள்,கண்டங்கள்,சமூத்திரங்கள் பெயர்கள் எழுதப்பட்டு சிலை தாங்கியும் அமைக்கப்பட்டிருந்தது.இதில் இலங்கையை அதன் மற்றொரு பெயரான ஈழம் என எழுதப்பட்டு அடைப்புக்குறிக்குள் இலங்கை என எழதப்பட்டிருந்தது.
இதுவே பயங்கரவாத தடுப்பு பிரிவினரிக்கு சர்ச்சையாக காணப்பட்டது. அதனால் நேற்று செவ்வாய்க் கிழமை கொழும்பில் இருந்து வருகை தந்திருந்த பயங்கரவாத தடுப்பு பிரிவினர் சிலையை அமைப்பதற்கு சபையின் வளாகத்தில் அனுமதி வழங்கிய கரைச்சி பிரதேச சபையின் செயலாரை சென்று விசாரித்துள்ளதோடு, குறித்த ஈழம் எனும் சொல் இனமுரப்பாட்டை, பிரிவினையை ஏற்படுத்தும் சொல் எனவும் தனிநாட்டை பிரதிபலிக்கிறது என்றும் எனவே அந்தச் சொல்லை பயன்படுத்த முடியாது என்றும் தெரிவித்த திருவள்ளுவா் சிலையின் சிலைதாங்கியில் உள்ள ஈழம் எனும் சொல்லை அழித்துவிடுமாறும் தெரிவித்துசென்றுள்ளனா்.
இதனையடுத்து பிரதேச சபை செயலலாளர் கிளிநொச்சி தமிழ்ச் சங்கத்தின் வாழ்நாள் தலைவா் இறைபிள்ளையை தொடர்பு கொண்டு ஈழம் எனும் சொல்லை அழித்து விடுமாறு தெரிவித்துள்ளா், அதன்படி இன்று புதன் கிழமை காலை ஏழு மணியளவில் உலக வடிவில் அமைக்கப்பட்ட சிலை தாங்கியில் இலங்கை மீது எழுதப்பட்டிருந்த ஈழம் அழிக்கப்பட்டுள்ளது.
இந்தச் செயற்பாடு மக்கள் மத்தியில் பெரும் விசனத்தை ஏற்படுத்தியுள்ளது.
பாடவிதானங்களில் கூட இலங்கையின் மறுபெயர்களில் ஒன்றாக ஈழம் குறிப்பிடப்பட்டு்ளளது. அத்தோடு காரைநகா் சிவன் கோவிலை ஈழத்துச் சிதரம்பரம் என்றே அழைக்கின்றாா்கள், தேவாரம்ங்கள், காப்பியங்கள் முதல் பல்வேறு சமய மற்றும் இலக்கியங்களில் ஈழம் என்ற சொல் தொன்று தொட்டு குறிப்பிடபட்டு வருகிறது.
இதனைதவிர தற்போது வடக்கில் ஈழம், தமிழீழம் எனும் சொற்களுடன் ஆரம்பிக்கப்படுகின்ற பல அரசியல் கட்சிகள் சட்ட ரீதியாக இயங்கி வருகிறது. இந்த நிலையில் திருவள்ளுவா் சிலையில் உள்ள பீடத்தில் இலங்கைக்கு எழுதப்பட்ட ஈழத்தை அழிக்க அறிவித்த பயங்கரவாத பிரிவினரையும் அதனை கேட்டு உடனடியாக அழித்த தமிழ்ச் சங்கத்தின் மீது மக்கள் விசனம். அடைந்துள்ளனா்.


தமிழ்த் தேசியக் கூட்டமைப்பையும் அரசையும் பிரித்து பார்ப்பது தவறு: கஜேந்திரகுமார்-Photo

அரசையும் தமிழ்த் தேசியக் கூட்டமைப்பையும் பிரித்து பார்ப்பதனால் தான் மக்களுக்கு அவர்கள் மீது கோபங்களும் வெறுப்புக்களும் ஏற்படுகிறது என தமிழ்த்தேசிய மக்கள் முன்ணணியின் தலைவர் கஜேந்திரகுமார் பொன்னம்பலம் தெரிவித்துள்ளார்.

இன்று(30) கிளிநொச்சியில் இடம்பெற்ற காணாமல் ஆக்கப்பட்டவர்களின் போராட்டத்தில் கலந்துகொண்ட பின்னர் ஊடகங்களுக்கு கருத்து தெரிவித்த போதே அவர் இதனை குறிப்பிட்டுள்ளார்.


இது குறித்து கருத்து வெளியிட்ட அவர்,

காணாமல் ஆக்கப்பட்டவர்களின் உறவினர்கள் எட்டு வருடங்களாக இந்தப் பிரச்சினையை தொடர்ந்து கொண்டிருக்கின்றார்கள். கடந்த மார்ச் மாதமும் ஐ.நாவால் அரசுக்கு இரண்டு வருட கால அவகாசம் வழங்கியதும் தமிழ்த் தேசியக் கூட்டமைப்பின் அனுமதியோடுதான்.

உண்மையில் பாதிக்கப்பட்ட மக்களின் பிரதிநிதிகள் என்ற வகையில் கூட்டமைப்பு அதற்கு மறுப்புத் தெரிவித்திருந்தால் இரண்டு வருட கால அவகாசம் வழங்கப்பட்டிருக்க வாய்பிருந்திருக்காது.

எனவே இன்றைக்கு கூட்டமைப்பில் இருக்கின்ற ஒரு சில நாடாளுமன்ற உறுப்பினர்கள் வந்து காணாமல் ஆக்கப்பட்டவர்களின் போராட்டத்தில் கலந்துகொண்டாலும் கூட அவர்கள் தொடர்ந்தும் அந்த தலைமையை ஏற்றுக்கொண்டிருக்கும் வரை அந்த தலைமை தொடர்ந்தும் அரசாங்கத்திற்கு துணைபோய்க் கொண்டிருக்கும் நிலைமை இருக்கும்.

அவர்கள் தொடர்ந்தும் இந்தத் தலைமையை ஏற்றுக் கொண்டிருக்கும் வரை அந்த தலைமை செய்யும் பச்சைத் துரோகத்தை இந்த தனிநபர்கள் இங்கு வந்து கலந்துகொண்டிருப்பது அந்த துரோகத்தை மூடி மறைப்பதாகத்தான் இருக்குமே தவிர வேறு எதுவும் கிடையாது.

தமிழ்த் தேசியக் கூட்டமைப்பையும் அரசையும் பிரித்து பார்ப்பது தவறு. தமிழ்த் தேசியக் கூட்டமைப்பு இன்று அரசின் ஒரு அங்கம். அரசும் தமிழ்த் தேசியக் கூட்டமைப்பும் ஒன்று தான் அதுதான் யதார்த்தம், அரசையும் தமிழ்த் தேசியக் கூட்டமைப்பையும் பிரித்து பார்ப்பதனால்தான் மக்களுக்கு அவர்கள் மீது கோபங்களும் வெறுப்புக்களும் ஏற்படுகிறது.

ஆகவே பாதிக்கப்பட்டுள்ள மக்களின் பிரச்சினைகள் தீர்க்கப்படாது இருப்பதன் பொறுப்பை அரசாங்கம் ஏற்றுக்கொள்கின்ற அதேவேளை அதற்கு சமமாக கூட்டமைப்பும் ஏற்றுக்கொள்ள வேண்டும் என்ற நிலைப்பாட்டை மக்களே முன்வைக்கின்ற நிலைமை வெகு தூரத்தில் இல்லை இன்றைய போராட்டமும் அதன் வெளிப்பாடாகதான் இருக்கிறது என்றார்.





வன்னேரியில் சுற்றுலா மையம் திறந்து வைப்பு....


வடமாகாண முதலமைச்சரின் அமைச்சின் மாகாண குறித்தொதுக்கப்பட்ட நிதியில் அமைக்கப்பட்ட சுற்றுலா மையம் இன்று கிளிநொச்சி வன்னேரிப் பகுதியில் திறந்து வைக்கப்பட்டுள்ளது.

6 மில்லியன் ரூபா செலவில் அமைக்கப்பட்ட அந்த சுற்றுலா மையத்தை வட மாகாண முதலமைச்சர் சீ.வி விக்னேஸ்வரன் திறந்து வைத்துள்ளதுடன், பறவைகள் சரணாலயமாகக் காணப்படுகின்ற வன்னேரிக் குளத்தை அண்டிய பகுதியிலேயே இந்த கட்டடம் அமைக்கப்பட்டுள்ளது.

குறித்த பகுதிக்கு வெளிநாட்டில் இருந்து பருவகாலப் பறவைகளும் அதிகம் வருகை தருகின்றமையால், இந்த பிரதேசத்தை எதிர் காலத்தில் மிகப்பெரிய சுற்றுலா மையமாக்கும் நோக்கோடு திறந்து வைக்கப்பட்டுள்ளது.

 மேலும், இந்த நிகழ்வில் பாராளுமன்ற உறுப்பினர் சி .சிறீதரன், வடமாகாண சபை உறுப்பினர் பசுபதிப்பிள்ளை, வடமாகாண ஆளுநரின் செயலாளர், கரைச்சிப் பிரதேச சபை செயலாளர், கரைச்சிப் பிரதேச செயலாளர் உட்பட பலரும் கலந்து கொண்டிருந்தனர்.

கிளியில் வீழ்த்தப்பட்ட நீர்த்தாங்கி விடுவிப்பு...


கிளிநொச்சி நகரில்  ஏ9 பிரதான வீதிக்கு அருகில் காணப்படுகின்ற யுத்த காலத்தில் வீழ்த்தப்பட்ட நீர்த்தாங்கியும் இராணுவத்தினரால் எதிர்வரும் 30ஆம் திகதி விடுவிக்கப்படுகிறது.

கடந்த காலத்தில் நாமல் ராஜபக்ஷவினால் பயங்கரவாதத்தின் அழிவை வெளிப்படுத்த வேண்டும் எனக் கூறி  வீழ்த்தப்பட்ட நீர்த்தாங்கி யுத்த அழிவு சின்னமாக பேணப்பட்டு வந்தது. அதனை கிளிநொச்சியில் உள்ள படையினர் பாதுகாத்து வந்தனர். பெருமளவான தென்னிலங்கை  சுற்றுலா பயணிகள் வருகைதந்து பார்வையிடுவது வழக்கமாக இருந்தது. அவர்களுக்கு இராணுவத்தினர்  வீழ்த்தப்பட்ட நீர்த்தாங்கி தொடர்பில் விளக்கமளித்து வந்தனர்.

யுத்த காலத்தில் இராணுவத்தினரால் மேற்கொள்ளப்பட்ட பாரிய அழிவுகள் தொடர்பில் காணப்பட்ட பலவற்றை அபிவிருத்தி  செய்து  அவற்றை இல்லாது செய்து அரசு விடுதலைப் புலிகளினால் வீழ்த்தப்பட்ட  நீர்த்தாங்கியை மாத்திரம் யுத்த அழிவுச் சின்னமாக பேணியமை தமிழ் மக்கள் மத்தியில் கடும் விசனத்தை ஏற்படுத்தியிருந்தது. மாவட்ட மற்றும் மாகாண மட்டங்களில் இடம்பெற்ற பல கூட் டங்களிலும் இது தொடர்பில் எதிர்ப்புக்கள் வெளிப்படுத்தப்பட்டன.

இந்த நிலையில் எதிர்வரும் 30ஆம் திகதி குறித்த நீர்த்தாங்கி உள்ள நாற்பது பேர்ச் காணி இராணுவத்தினரால் கரைச்சி பிரதேச செயலாளரிடம் கையளிக்கப்படவுள்ளது. அதனை பிரதேச செயலகம் தேசிய நீர் வழங்கல் மற்றும் வடிகால் அமைப்பு சபையிடம் கையளிக்கவுள்ளது.                    

படையினர் வசமுள்ள காணிகளை விடுப்பதற்காக தொடரும் போராட்டங்கள்....


யுத்தம் முடிவடைந்து ஒன்பது வருடங்கள் கடந்துள்ள போதும் கூட மக்கள் தங்களுடைய காணிகளை விடுவிப்பதற்காக பெரும் கஷ்டங்களுக்கு மத்தியில் பாடுபட்டு வருகின்றார்கள் என பாராளுமன்ற உறுப்பினர் சாந்தி சிறீஸ்கந்தராசா தெரிவித்துள்ளார்.

பாராளுமன்றில் இன்று உரையாற்றும் போதே அவர் இதனை கூறினார்.

இதன்போது மேலும் தெரிவிக்கையில்,

30 வருட யுத்தத்தின் போது மக்கள் பல துன்பங்களை சந்தித்ததுடன், தமது பூர்வீக காணிகளையும் இழந்தனர். இந்தநிலையில் அந்த காணிகளுக்காக பல்வேறு இடங்களிலும் போராட்டங்கள் மேற்கொள்ளப்பட்டு வருகின்றன.

இருப்பினும் அவர்களுடைய காணிகள் இன்றையளவிலும் படையினரின் வசமே உள்ளன. எனவே இது தொடர்பில் உடனடி கவனமெடுத்து மக்களுக்கு தீர்வினை பெற்றுத்தர வேண்டும் என கோரியுள்ளமை குறிப்பிடத்தக்கது.

வெடிபொருட்கள் அகற்றுவதில் பாரிய சவால்...


கிளிநொச்சி - முகமாலைப் பகுதியில் வெடிபொருட்களை அகற்றுவதில் பாரிய சவால்களை எதிர்கொள்வதாக கண்ணிவெடி அகற்றும் நிறுவனத்தினர் தெரிவித்துள்ளனர்.

யுத்தத்தின் பின்னர் இதுவரை மீள் குடியமர்விற்கு அனுமதிக்கப்படாத பகுதியாகவும் அதிகளவு வெடிபொருள், ஆபத்தான பகுதியாக முகமாலை காணப்படுவதாக கூறப்படுகின்றது.

கடந்த கால யுத்தத்தின் போது அதிளவான வெடிபொருட்கள் புதைக்கப்பட்டதாகவும், இரு தரப்புக்களும் தொடர்ச்சியாக யுத்தத்தில் ஈடுபட்டதாகவும் காணப்படும் இந்த பகுதியில் வகை தொகையின்றி வெடிபொருட்கள் புதைக்கப்பட்டுள்ளதுடன் நீண்ட காலம் காத்திருந்து உயிர்களை காவு கொள்ளும் ஆபத்தான பகுதியாகவும் காணப்படுகின்றது.

அத்துடன், 2000ம் ஆண்டு காலப் பகுதியிலும் அதன் பின்னர் கடந்த 2006ம் ஆண்டு முதல் 2008ம் டிசம்பர் மாதம் வரை யுத்தத்தில் ஈடுபட்ட இரு தப்புக்களும் பரஸ்பரம் மோதிக்கொண்ட பகுதியாக காணப்படும் கிளிநொச்சி, கிளாலி முதல் யாழ் வடமராட்சி கிழக்கு, நாகர் கோவில் வரைக்குமான ஏறத்தாள ஏழு கிலோ மீற்றர் நீளமான பகுதிகளில் அதிகளவான நிலக்கண்ணி வெடிகளும் ஆபத்தான வெடிபொருட்களும் புதைக்கப்பட்டதாக தெரியவந்துள்ளது.

இந்நிலையில், தினமும் இரு தரப்புக்களும் மோதிக்கொள்ளும் இந்த பகுதிகளின் கடந்த ஏழு ஆண்டுகளுக்கு மேலாக வெடிபொருட்கள் அகற்றும் பணிகள் முன்னெடுத்து வருகின்றனர்.

இதில் குறிப்பிட்ட சில பகுதிகளில் மீள்குடியேற்றத்திற்கு அனுமதிக்கப்பட்ட போதும் பல இடங்கள் இன்றும் ஆபத்தானதாகவே காணப்படுகின்றது.

இது தொடர்பில் டாஸ் நிறுவனத்தின் முக்கிய பிரதிநிதி ஒருவர் கருத்துத் தெரிக்கையில்,

குறித்த பகுதியில் அதிகளவான நிலக்கண்ணி வெடிகள், வாகன கண்ணி வெடிகள் என்பன மிகவும் ஆபத்தான நிலையில் புதைக்கப்பட்டுள்ளன.

வெடிக்காத நிலையில் காணப்படுகின்ற வெடிபொருட்களும் அதிகளவில் உள்ளன. அத்துடன் இராணுவ மண் அணைகள் கைவிடப்பட்ட காவலரண்களுக்கு அருகில் மிக ஆபத்தான வகையில் இந்த வெடிபொருட்கள் புதைக்கப்பட்டுள்ளன.

இதனை அகற்றுவதில் பாரிய சவால்கள் காணப்படுகின்றதாகவும் இவ்வாறான பகுதிகளுக்குள் பொதுமக்கள் பலர் நுழைந்து உயிரிழப்புக்கள் மற்றும் காயங்களுக்கு உள்ளாகியுள்ளனர் எனவும் டாஸ் நிறுவனத்தின் முக்கிய பிரதிநிதி ஒருவர் குறிப்பிட்டுள்ளார்.


Popular Posts-Last 30 days