மன்-புனித சவேரியார் ஆண்கள் தேசிய பாடசாலைக்கு புதிய அதிபர் நியமனத்தை கண்டித்து எதிர்ப்பு பேரணி-புதிய அதிபரின் நியமனம் ரத்து - படங்கள்

மன்னார் புனித சவேரியார் ஆண்கள் தேசிய பாடசாலைக்கு புதிய அதிபர் ஒருவர் நியமிக்கப்பட்டுள்ளமையினை கண்டித்து அப்பாடசாலை மாணவர்களின் பெற்றோர் இன்று திங்கட்கிழமை(21) எதிர்ப்பு பேரணி ஒன்றை மேற்கொண்டுள்ளனர். குறித்த பாடசாலை மன்னார் மாவட்டத்தில் தலைசிறந்ததும்,முதன்மையானதுமான கத்தோழிக்கப்பாரம்பதியத்தின் வழிகாட்டலின் கீழும் உயர்ந்து விளங்கும் பாடசாலையாக காணப்படுகின்றது. இப்பாடசாலையின் வரலாற்றின் அடிப்படையில் கத்தோழிக்க மதத்தினைச் சேர்ந்த குருவானவர்கள் மற்றும் டிலாசால் அருட்சகோதரர்கள் ஆகியோரால் பாடசாலை வழிநடத்தப்பட்டு வருகின்றது. 

இப்பாடசாலையின் வளர்ச்சியில் பெரும் பங்கை கடந்த 6 சதாப்தங்களுக்கு மேலாக டிலாசால் அருட்சகோதரர்களையே சார்ந்து காணப்படுகின்றது. இந்த நிலையில மத்திய அமைச்சின் கீழ் புதிதாக அதிபர் சேவை தரத்தினை பெற்றுக்கொண்ட ஒருவர் இப்பாடசாலைக்கு புதிய அதிபராக நியமிக்கப்பட்டார். 

குறித்த அதிபர் தனது அதிபர் நியமனத்தை ஏற்றுக்கொள்ள இன்று திங்கட்கிழமை பாடசாலைக்கு வருகை தர இருந்தார். இந்த நிலையிலே குறித்த அதிபரின் வருகையை கண்டித்தும்,அவரின் நியமனத்திற்கு எதிர்ப்புத்தெரிவித்தும் பாடசாலை மாணவர்களின் பெற்றோர்கள் பல நூற்றுக்கணக்கானவர்கள் ஒன்றினைந்து எதிர்ப்பினை வெளிப்படுத்தினர்.  

இன்று காலை 8 மணியளவில் பாடசாலைக்கு முன்பாக ஒன்று கூடிய பல நூற்றுக்கணக்கான பெற்றோர் பதாதைகளை ஏந்தியவாறு தமது எதிர்ப்பை வெளிப்படுத்தினர். பில் பெற்றோர்கள் பதாதைகளை ஏந்தியவாறு ஊர்வலமாக மன்னார் வலயக்கல்விப்பணிமனையினை சென்றனர். இதன் போது மன்னார் மறைமாவட்ட ஆயர் இராயப்பு ஜோசேப்பு ஆண்டகை,மன்னார் நகர சபையின் தலைவர் எஸ்.ஞானப்பிரகாசம், உப தலைவர் ஜேம்ஸ் ஜேசுதாஸ் மற்றும் பெற்றோர்,பழைய மாணவர்சங்க பிரதி நிதிகள் ஆகியோர் மன்னார் வலயக்கல்விப்பணிப்பாளர் எம்.எம்.சியான் அவர்களை சந்தித்தித்து உரையாடினர்.  

நீண்ட நேர பேச்சுவார்த்தையின் பின் உடனடியாக குறித்த புதிய அதிபரின் நியமனத்தை இரத்துச் செய்வதாக உறுதியளித்த மன்னார் வலயக்கல்விப்பணிப்பாளர் எம்.எம்.சியான்,தற்போது உள்ள அதிபரின் நிர்வாகம் தொடர்ந்தும் அமுலில் இருக்கும் எனவும் அதில் எவ்வித மாற்றமும் இருக்காது என மன்னார் வலயக்கல்விப்பணிப்பாளர் எம்.எம்.சியான் உறுதியளித்தார். இதனைத்தொடர்ந்து மன்னார் வலயக்கல்விப்பணிமனைக்கு முன் கூடியிருந்த பெற்றோர் கலைந்து சென்றனர்.