வசூலில் ரூ.118 கோடியைத் தாண்டி ஆலியா பட்டின் ‘ராஸி’ புதிய சாதனை!

மும்பை: ஆலியா பட் நடிப்பில் வெளியான ‘ராஸி’ திரைப்படம் வசூலில் சாதனை படைத்துள்ளது.

பாலிவுட்டின் இளம் நடிகைகளில் பிஸியாக வலம் வருபவர் ஆலியா பட். இவரது நடிப்பில் வெளிவந்த ஹை-வே, உட்தா பஞ்சாப் போன்ற படங்கள் ரசிகர்கள் மத்தியில் பெரும் வரவேற்பை பெற்றன.

இந்நிலையில் மேக்னா குல்ஸார் இயக்கத்தில் மே 11ஆம் தேதி வெளியான ‘ராஸி’ படத்தில் ஆலியா பட் மாறுபட்ட கதாபாத்திரத்தில் நடித்துள்ளார். கடந்த 1971ல் இந்தியா - பாகிஸ்தான் நாடுகளுக்கு இடையே நிலவி வந்த பரபரப்பான சூழலில் நிகழ்ந்த உண்மைக் கதையை அடிப்படையாகக் கொண்டு உருவாக்கப்பட்டுள்ளது.

இப்படத்தை ஜங்கிளி பிக்சர்ஸ், தர்மா புரொடக்‌ஷன்ஸ் நிறுவனங்கள் கூட்டாக தயாரித்துள்ளன.

இந்தப் படத்தில் தந்தைக்கு பாசமிகு மகளாக, அன்பான மனைவியாக, உளவு பார்க்கும் அதிகாரியாக மூன்று வேடங்களில் அசத்தலான நடிப்பை வெளிப்படுத்தியுள்ளார். ஆலியா பட்டின் நடிப்பை ரசிகர்கள் பெரிதும் பாராட்டியுள்ளனர்.

அவரது திரைப் பயணத்தில் ‘ராஸி’ ஒரு மைல்கல் என்றும் கூறும் அளவிற்கு கொண்டாடி வருகின்றனர். பெரும்பாலான ஊடகங்கள் 4 ஸ்டார் ரேட்டிங் வழங்கியுள்ளன. அதுமட்டுமல்லாமல் பாக்ஸ் ஆபிஸில் தொடர் சாதனைகளை படைத்து வருகிறது.

’ராஸி’ படம் வெளியாகி 5 வாரங்கள் ஆகியுள்ளன. 5வது வாரத்தில் மட்டும் ரூ.0.45 கோடி வசூலை ஈட்டியுள்ளது. ஒட்டுமொத்தமாக ‘ராஸி’ படம் ரூ.118.24 கோடி வசூலை குவித்துள்ளது. இதனால் படக்குழுவினர் மிகுந்த மகிழ்ச்சியில் உள்ளனர்.