மன்னாரில் பாடசாலை மாணவர்களுக்கு 'பைஸர்' தடுப்பூசி செலுத்தும் நடவடிக்கை முன்னெடுப்பு.

மன்னார் மாவட்டத்தில் 7 தொடக்கம் 10 ஆண்டு வரை கற்கின்ற மாணவர்களுக்கான 'பைஸர்' முதலாவது தடுப்பூசி செலுத்தும் நடவடிக்கைகள் இன்றைய தினம் வெள்ளிக்கிழமை (21) காலை மன்/லூசியா மகா வித்தியாலயம் உட்பட பல பாடசாலைகளில் இடம் பெற்று வருகின்றது . -மன்னார் மாவட்ட பிராந்திய சுகாதார பணிப்பாளர் வைத்தியர் ரி.வினோதன் தலைமையில், மன்னார்,நானாட்டான்,முசலி,மாந்தை மேற்கு மற்றும் மடு ஆகிய சுகாதார வைத்திய அதிகாரி பிரிவுகளில், தெரிவு செய்யப்பட்ட பாடசாலைகளில் இன்றைய தினம் வெள்ளிக்கிழமை காலை 9 மணி முதல் குறித்த தடுப்பூசி செலுத்தும் பணிகள் ஆரம்பிக்கப்பட்டுள்ளது. 

 7 தொடக்கம் 10 ஆண்டு கற்கின்ற 12 தொடக்கம் 16 வயதுடைய மாணவர்களுக்கு கொரோனா தடுப்பூசியான பைஸர் தடுப்பூசியின் முதலாவது தடுப்பூசி செலுத்தும் நடவடிக்கைகள் முன்னெடுக்கப்பட்டுள்ளது. தடுப்பூசி செலுத்தும் நிலையங்களான பாடசாலைகளில் சுகாதார வைத்திய அதிகாரிகள், பொது சுகாதார பரிசோதகர்கள், வைத்தியசாலை பணியாளர்கள் , இராணுவம் மற்றும் விமானப்படை ஆகியோரின் ஒத்துழைப்புடன் பைஸர் முதலாவது தடுப்பூசி செலுத்தும் நடவடிக்கைகள் முன்னெடுக்கப்பட்டது. இதுவரை மன்னார் மாவட்டத்தில் 8500 மேற்பட்ட பாடசாலை மாணவர்கள் பைஸர் தடுப்பூசியை பெற்று கொண்டுள்ளமை குறிப்பிடதக்கது