சமூக வலைதளத்தில் தன்னைப் போன்ற பெண்ணை தேடி கொலை செய்த இளம்பெண்

தெற்கு ஜெர்மனியில் உள்ள முனிச் பகுதியை சேர்ந்த 24 வயது இளம்பெண் ஷராபன். இவரது காதலன் ஷேகிர். கடந்த சில நாட்களுக்கு முன்பு குடும்பத்தில் ஏற்பட்ட தகராறு காரணமாக ஷராபன் தலைமறைவாக இருக்க விரும்பி உள்ளார். இதற்காக தன்னை போல தோற்றம் அளிக்கும் ஒரு பெண்ணை சமூக வலைதளங்களில் தேடி உள்ளார். அப்போது கதீஜா (23) என்ற இளம்பெண்ணை சமூக வலைதளம் மூலம் கண்டுபிடித்துள்ளார். கதீஜாவும் தன்னை போலவே தோற்றம் அளிப்பதை உறுதி செய்த ஷராபன், அவரை இன்ஸ்டாகிராமில் தொடர்பு கொண்டு பேசியுள்ளார். அப்போது தன்னிடம் அழகு கிறீம்கள் இருப்பதாகவும், அதனை உங்களுக்கு தருகிறேன் எனவும் ஆசைகாட்டி கதீஜாவை நேரில் சந்திக்க அழைத்துள்ளார். அதை நம்பி கதீஜா சென்ற போது ஷராபனும் அவரது காதலரான ஷேகிரும் சேர்ந்து கதீஜாவை காரில் கடத்தி சென்று கொலை செய்துள்ளனர். 

 பின்னர் கதீஜா உடலை சாக்கு பையில் கட்டி காரில் மறைத்து வைத்துவிட்டு ஷராபன் காதலனுடன் தலைமறைவாகியுள்ளார். இதற்கிடையே ஷராபனை காணவில்லை என அவரது பெற்றோர் பொலிஸில் புகார் செய்துள்ளனர். அதன்பேரில் பொலிஸார் தேடிய போது, காட்டு பகுதியில் கார் நிறுத்தப்பட்டிருந்த காருக்குள் ஒரு சடலம் கிடைத்துள்ளது. பொலிஸார் உடலை டி.என்.ஏ. பரிசோதனைக்கு அனுப்பியுள்ளனர். முதலில், காரில் கொலை செய்யப்பட்டு கிடந்தது ஷராபன் என அவரது பெற்றோர் கருத்தியபோதும், டி.என்.ஏ. பரிசோதனையில் கொலை செய்யப்பட்டது கதீஜா என்பது கண்டுபிடிக்கப்பட்டுள்ளது. தொடர்ந்து பொலிஸார் நடத்திய விசாரணையில் குடும்ப பிரச்சினை காரணமாக ஷராபன் தலைமறைவாக இருப்பதற்காக காதலனுடன் சேர்ந்து கதீஜாவை கொலை செய்ததும், பின்னர் காதலனுடன் தலைமறைவாக வாழ்ந்து வருவதும் தெரியவந்துள்ளது. இதையடுத்து பொலிஸார் அவர்கள் இருவரையும் கைது செய்துள்ளனர்.