உடல் பாதிக்கப்பட்டாலும் கனவுகளை வெல்லத் துடிக்கும் மன்னாரை சேர்ந்த இரு சகோதரர்கள் – பிள்ளைகளுக்காக வாழ்க்கையை அர்ப்பணித்த பெற்றோர்!

 சில கதைகளை படிக்கும் போது நம்மை அறியாமலேயே உடல் சிலிர்க்கும்… கண்கள் கலங்கும்… மனம் கனத்துப் போகும்.

ஆனால், இந்தக் குடும்பத்தின் வாழ்க்கையைப் பற்றி தெரிந்து கொண்டால், உங்களுக்கும் அப்படி ஒரு உணர்வு ஏற்படலாம்.

இது வெறுமனே ஒரு நோயுடன் போராடும் குடும்பத்தின் கதை அல்ல…

தங்களது இரு பிள்ளைகளின் எதிர் காலத்திற்காக வாழ்க்கையையே மாற்றியமைத்த பெற்றோரின் கதை…

உடல் பலவீனத்தை தாண்டி கல்வியிலும் சாதனைகளிலும் முன்னேறும் இரு சகோதரர்களின் கதை…

அந்த இரு சகோதரர்கள் தான் அகில் மெத்யூ மற்றும் ஆத்விக் மெத்யூ.

தனது மகன் அகில் மெத்யூவுக்கு தசைச் சிதைவு(Spinal Muscular Atropy type 2)நோய் இருப்பது தெரிய வந்தபோது, அந்தத் தந்தை ஆரம்பத்தில் பெரும் அதிர்ச்சி அடைந்தார்.

தனது மகனை எப்படியாவது முழுமையாக குணப்படுத்திவிட வேண்டும் என்ற நம்பிக்கையில் இந்தியா மற்றும் இலங்கையிலுள்ள பல்வேறு மருத்துவமனைகளுக்கு அழைத்துச் சென்றார்.

அனைத்து பரிசோதனைகளும் மேற்கொண்டார். பல்வேறு சிகிச்சைகளையும் முயற்சித்தார்.

ஆனால், இந்த நோயை முழுமையாகக் குணப்படுத்துவதற்கான சிகிச்சை இல்லை என்பதை அறிந்தபோது, ஒரு தந்தையாக அவர் எதிர்கொண்ட வேதனை சொல்லில் அடங்காதது.

அந்த வேதனை முடிவதற்குள், மற்றொரு அதிர்ச்சியும் அந்தக் குடும்பத்தை தாக்கியது.அதே நோய் அவரது மற்றொரு மகனான ஆத்விக் மெத்யூவையும் பாதித்தது.

ஒரு மகனின் நோயுடன் போராடிய குடும்பம்… இப்போது இரண்டு மகன்களின் எதிர் காலத்திற்காகப் போராட வேண்டிய நிலைக்கு தள்ளப்பட்டது.

இந்த இரு பிள்ளைகளின் தந்தை ஓர் அரச உத்தியோகத்தர்.

தனது தொழில் வாழ்க்கையையும் பொறுப்புகளையும் தொடர்ந்து முன்னெடுத்துச் செல்லும் அதேவேளை, தனது பிள்ளைகளின் தேவைகளுக்காகவும் வாழ்க்கையின் பெரும்பகுதியை அர்ப்பணித்து வருகிறார்.

அவர்களின் தாயும் தந்தையும் தங்களது தனிப்பட்ட வாழ்க்கையையே பிள்ளைகளுக்காக மாற்றியமைத்துள்ளனர்.

பிள்ளைகள் பாடசாலைக்குச் செல்லும்போது அவர்களுடன் தாயும் தினமும் செல்கிறார்.

பாடசாலையில் அவர்களுக்கு கழிப்பறைக்குச் செல்ல உதவுவது முதல் கல்வித் தேவைகளில் துணையாக இருப்பது வரை, ஒவ்வொரு நாளும் அவர்களுடன் பயணிக்கிறார்.

சில தருணங்களில், தாயும் தந்தையும் இரு பிள்ளைகளையும் மோட்டார் சைக்கிளில் ஏற்றிக்கொண்டு பாடசாலைக்குச் செல்லும் காட்சியைப் பார்க்கும்போது, ஒரு குடும்பம் எதிர்கொள்ளும் சவால்கள் எவ்வளவு பெரியவை என்பதை உணர முடிகிறது.

இரண்டு பிள்ளைகளையும் தூக்கி ஏற்றுவது, அவர்களைச் சுமந்து செல்வது, அவர்களின் அன்றாடத் தேவைகளைக் கவனிப்பது என பெற்றோர் ஒவ்வொரு நாளும் பல்வேறு சிரமங்களை எதிர்கொள்கின்றனர்.

ஆனால், அந்தச் சிரமங்கள் எதுவும் தங்களது பிள்ளைகள் கல்வி கற்க வேண்டும் என்ற அவர்களின் விருப்பத்திற்கு தடையாக இருக்கவில்லை.

ஒரு தாயும் தந்தையும் தங்களது பிள்ளைகளுக்காக எவ்வளவு தூரம் தியாகம் செய்ய முடியும் என்பதற்கு இந்தக் குடும்பத்தின் வாழ்க்கையே ஒரு எடுத்துக்காட்டு!இந்த இரு சகோதரர்களின் வாழ்க்கையில் பெற்றோரின் பங்களிப்பு அளவிட முடியாதது என்றால், பாடசாலை நண்பர்களும் ஆசிரியர்களும் வழங்கும் உதவிகளும் மிகவும் முக்கியமானவை.

பாடசாலைக்குச் செல்லும்போது அவர்களின் புத்தகப் பைகளைத் தூக்கிச் செல்வது, தேவையான உதவிகளைச் செய்வது, அவர்களுடன் இணைந்து நேரத்தைச் செலவிடுவது சக்கர நாற்காலியை தள்ளுவது என நண்பர்கள் அன்புடன் துணையாக இருக்கின்றனர்.

அதேபோல், ஆசிரியர்களும் இந்த இரு பிள்ளைகளின் நிலையைப் புரிந்துகொண்டு, அவர்களுக்கு தேவையான உதவிகளை வழங்கி வருகின்றனர்.

கல்வி கற்பதில் அவர்களுக்கு ஏற்படும் சிரமங்களைக் கருத்தில் கொண்டு, அக்கறையுடனும் பொறுமையுடனும் வழிகாட்டுகின்றனர்.

பாடசாலை நண்பர்களும் ஆசிரியர்களும் அவர்களை மற்ற மாணவர்களைப் போலவே நடத்தி, அவர்களது கல்விப் பயணத்தில் ஆதரவாக நிற்பது இந்தக் குடும்பத்திற்கு பெரும் நம்பிக்கையை அளிக்கிறது.

உதவிக்கரம் நீட்டும் நண்பர்கள்… வழிகாட்டும் ஆசிரியர்கள்… தியாகம் செய்யும் பெற்றோர்… இவர்கள் அனைவரின் ஆதரவுடனும் இந்த இரு சகோதரர்களும் தங்களது வாழ்க்கைப் பயணத்தைத் தொடர்ந்து வருகின்றனர்.

தசைச் சிதைவு மற்றும் இது போன்ற நோயால் பாதிக்கப்பட்ட பல பிள்ளைகள் வீட்டுக்குள்ளேயே முடங்கிக் கிடக்கும் நிலை காணப்படுவதாக அந்தத் தந்தை கவலை தெரிவிக்கிறார்.

சில பெற்றோர் தங்களது பிள்ளைகளை வெளியில் அழைத்துச் சென்றால் மற்றவர்கள் என்ன சொல்வார்கள் என்ற தயக்கத்தினால், அவர்களை வீட்டுக்குள்ளேயே வைத்திருப்பதாகவும் அவர் சுட்டிக்காட்டுகிறார்.ஆனால், தனது பிள்ளைகளும் மற்றவர்களைப் போலவே வெளியில் சென்று, கல்வி கற்று, சமூக வாழ்க்கையை அனுபவிக்க வேண்டும் என்பதே அவரது விருப்பம்.

“எனது பிள்ளைகளும் மற்றவர்களைப் போலவே வாழ வேண்டும். அவர்களை வீட்டுக்குள் முடக்கி வைக்காமல், சமூகத்தில் மற்ற பிள்ளைகளுடன் இணைந்து வாழவும், கல்வி கற்கவும் வாய்ப்பு வழங்க வேண்டும்” என்பதே அந்தத் தந்தையின் எதிர்பார்ப்பு.

அகில் மெத்யூ மற்றும் ஆத்விக் மெத்யூ ஆகிய இருவரும் தங்களது உடல் நிலை காரணமாக பல சவால்களை எதிர்கொண்டாலும், கல்வி மீதான ஆர்வத்தை ஒருபோதும் கைவிடவில்லை.

பாடசாலையில் சிறப்புத் தேவையுடைய மாணவர்களுக்கென தனிப்பிரிவு இருந்தபோதிலும், தங்களால் இயன்ற அளவுக்கு சாதாரண மாணவர்களுடன் இணைந்து கல்வி கற்று வருகின்றனர்.

அவர்களின் முயற்சிக்கு கிடைத்த வெற்றி அனைவரையும் வியக்க வைக்கிறது.இருவரும் புலமைப்பரிசில் பரீட்சையில் சித்தி அடைந்துள்ளனர்.

அதில் ஆத்விக் மத்யூ, 2026 க்கான புலமைப்பரிசில் தேர்வில் தான் கல்வி கற்கும் மன்/புனித சவேரியார் ஆண்கள் தேசிய பாடசாலையில் முதலாவது இடத்தைப் பெற்று சாதனை படைத்துள்ளார்.

இன்னும் ஆச்சரியமான விடயம் என்னவென்றால், இருவரும் எந்தவொரு தனியார் வகுப்புக்கும் செல்லாமல் வீட்டில் இருந்து படித்து இந்தச் சாதனைகளைப் படைத்துள்ளனர்.

தங்களது உடல்நிலை காரணமாக பல சவால்களை எதிர் கொண்டாலும், பாடசாலையில் கிடைக்கும் கல்வியை மட்டுமே நம்பி, தங்களது முயற்சியால் இந்த வெற்றிகளைப் பெற்றுள்ளனர்.

அதுமட்டுமல்ல…

பல்வேறு போட்டிகளில் குறிப்பாக செஸ் போட்டியிலும் பங்கேற்று வெற்றிகளையும், பதக்கங்களையும், கிண்ணங்களையும் பெற்றுள்ளனர்,பாடசாலை மாணவர்களுக்கான சதுரங்க போட்டியில் மாகாண மட்டம் ,தேசிய மட்டம் வரை சென்று விளையாடியுள்ளனர்

உடல் வலிமை குறைந்திருக்கலாம்… ஆனால் அறிவிலும் திறமையிலும் அவர்கள் யாருக்கும் குறைந்தவர்கள் அல்ல என்பதை நிரூபித்து வருகின்றனர்.

அகில் மெத்யூவின் கனவு ஒரு Software Engineer ஆக வேண்டும் என்பதாகும்.

தொழில்நுட்ப உலகில் சாதித்து, தனது வாழ்க்கையைத் தானே அமைத்துக்கொள்ள வேண்டும் என்பதே அவரது இலட்சியம்.

ஆத்விக் மெத்யூவின் கனவு இன்னும் வித்தியாசமானது.

தன்னைப் போன்ற பிள்ளைகளைப் பாதிக்கும் தசைச் சிதைவு நோய்க்கு எதிர்காலத்தில் தீர்வு காண வேண்டும் என்பதே அவரது விருப்பம்.

ஒரு விஞ்ஞானியாகி, இந்த நோயை முழுமையாகக் குணப்படுத்தக்கூடிய அல்லது அதன் தாக்கத்தைக் குறைக்கக்கூடிய மருந்தைக் கண்டுபிடிக்க வேண்டும் என்பதே அவரது கனவு.

தன்னைப் பாதித்த நோயை எதிர்காலத்தில் மற்ற பிள்ளைகள் எதிர்கொள்ளக்கூடாது என்பதற்காக ஒரு விஞ்ஞானியாக வேண்டும் என்று கனவு காணும் இந்தச் சிறுவனின் இலட்சியம் உண்மையிலேயே மனதைத் தொடுகிறது.

இந்தக் குடும்பத்தின் வாழ்க்கை பல கேள்விகளையும் சமூகத்தின் முன்வைக்கிறது.

சிறப்புத் தேவையுடைய பிள்ளைகள் பாடசாலைகளுக்குச் செல்வதற்கும், பொது சேவைகளைப் பெறுவதற்கும், சமூகத்தில் சுதந்திரமாக வாழ்வதற்கும் தேவையான வசதிகள் இலங்கையில், குறிப்பாக மாவட்ட மட்டங்களில், போதுமானதாக இல்லை என அந்தத் தந்தை சுட்டிக்காட்டுகிறார்.

சக்கர நாற்காலிகள் மற்றும் அணுகல்தன்மை கொண்ட பாடசாலைகள் நாடு முழுவதிலும் அமையப்பெற வேண்டும் , போக்குவரத்து வசதிகள், பொது நிறுவனங்கள், வணிக வளாகங்களில் தேவையான அடிப்படை வசதிகள் மற்றும் சிறப்புத் தேவையுடைய பிள்ளைகளுக்கு ஆதரவான சூழல் உருவாக்கப்பட வேண்டும் என்பதே அவரது கோரிக்கை.

இவர்கள் பரிதாபப்பட வேண்டியவர்கள் அல்ல… இவர்களுக்கு வாய்ப்புகள் வழங்கப்பட வேண்டும்!

இவர்களது கல்வி உரிமை, சமூக வாழ்க்கை மற்றும் எதிர்காலக் கனவுகளை நனவாக்குவதற்கு குடும்பத்தின் ஆதரவு மட்டுமல்ல, சமூகத்தினதும் , தனியார் மற்றும் அரச நிறுவனங்களினதும் ஒத்துழைப்பும் அவசியமாகிறது.

அகில் மெத்யூ மற்றும் ஆத்விக் மெத்யூ ஆகிய இரு சகோதரர்களின் வாழ்க்கை நமக்கு ஒரு முக்கியமான செய்தியைச் சொல்கிறது.

உடல் பாதிக்கப்பட்டாலும் வாழ்க்கை முடிந்துவிடவில்லை… சவால்கள் இருந்தாலும் கனவுகள் அழிந்துவிடவில்லை…

தங்களது பிள்ளைகளுக்காக பெற்றோர் வாழ்க்கையையே மாற்றியமைத்துள்ளனர்.

பிள்ளைகள் தங்களது உடல் நிலையைத் தாண்டி கல்வியிலும் சாதனைகளிலும் முன்னேறி வருகின்றனர்.

அவர்களின் ஆசிரியர்களும் நண்பர்களும் அவர்களுக்கு ஆதரவாக இருக்கின்றனர்.

இந்தக் குடும்பத்தின் எதிர்பார்ப்பு ஒன்றே…

தங்கள் பிள்ளைகளைப் போன்ற ஏனைய பிள்ளைகள் வீட்டுக்குள் முடங்காமல், மற்றவர்களைப் போலவே பாடசாலைக்குச் சென்று, கல்வி கற்று, சமூகத்தில் வாழ்ந்து, தங்களது கனவுகளை நனவாக்கக்கூடிய சூழல் உருவாக வேண்டும்.

உடல் அவர்களைப் பலவீனப்படுத்தியிருக்கலாம்… ஆனால் அவர்களின் கனவுகளை பலவீனப்படுத்தவில்லை!

அகில் மெத்யூ மற்றும் ஆத்விக் மெத்யூ…

இவர்கள் இருவரும் வெறும் நோயுடன் போராடும் சிறுவர்கள் அல்ல…

விடாமுயற்சியால் சாதிக்க முடியும் என்பதற்கும், பெற்றோரின் அன்பு எத்தகைய தடைகளையும் தாண்டிச் செல்லும் என்பதற்கும் வாழும் எடுத்துக்காட்டுகள்!

இந்தச் செய்தி, இந்தக் குடும்பம் உதவி கோருவதற்காக வெளியிடப்படுவதல்ல.

இது தங்களது இரு பிள்ளைகளின் எதிர்காலத்திற்காக வாழ்க்கையையே அர்ப்பணித்த பெற்றோரின் தியாகத்தையும், பல்வேறு சவால்களுக்கு மத்தியிலும் கல்வியிலும் சாதனைகளிலும் முன்னேறி வரும் இரு சகோதரர்களின் விடாமுயற்சியையும் சமூகத்திற்கு எடுத்துக்காட்டும் ஒரு மனிதநேயக் கதை.…

இவர்களின் கதையைப் பகிர்வதும், இவர்களைப் போன்ற பிள்ளைகளுக்கு சமூகத்தில் உரிய அங்கீகாரத்தையும் வாய்ப்புகளையும் உருவாக்குவதும் நம் அனைவரினதும் பொறுப்பாகும்