தமிழரசுக் கட்சிக்குத் கட்சி தாவினார் சிவமோகன்

கூட்டமைப்பு சார்பு நாடாளுமன்ற உறுப்பினர் வைத்திய கலாநிதி சிவமோகன் தமிழரசுக்கட்சியில் இன்று இணைந்து கொண்டுள்ளார். நடந்து முடிந்த நாடாளுமன்ற தேர்தலில் ஈபிஆர்எல்எவ் கட்சி சார்பில் வன்னித்தொகுதியில் போட்டியிட்டு வெற்றி பெற்றிருந்த சிவமோகன் இன்று மார்டின் வீதியிலுள்ள தமிழரசுக்கட்சி தலைமை அலுவலகத்திற்கு விஜயம் செய்து தனது அங்கத்துவ படிவத்தை பூரணப்படுத்தி வழங்கியதுடன் கட்சி தலைவர் மாவை.சேனாதிராசா முன்னிலையினில் கட்சியில் இணைந்து கொண்டுள்ளார்.

ஏற்கனவே கூட்டமைப்பின் பங்காளிக்கட்சிகளான தமிழரசுக்கட்சி மற்றும் ஈபிஆர்எல்எவ் கட்சி முரண்பட்டுள்ள நிலையில் சிவமோகன் கட்சி தாவியுள்ளமை முரண்பாட்டை உச்சமடைய வைக்குமென அச்சமடைய வைத்துள்ளது.

ஏற்கனவே புதிய அரசின் வரவு செலவுத்திட்டத்தை ஈபிஆர்எல்எவ் கட்சி எதிர்த்து வாக்களித்த போது சிவமோகன் சத்தமின்றி வெளியேறி எதிர்த்து வாக்களித்ததை தவிர்த்திருந்தார். இதன் பலனாக மாவட்ட ஒருங்கிணைப்பு குழுவின் இணைத்தலைவராக சிவமோகனிற்கும் சுமந்திரனின் சிபார்சின் அடிப்படையினில் அரசு சந்தர்ப்பம் வழங்கியுள்ளமை குறிப்பிடத்தக்கது.