உலகத்தையே அச்சத்தில் ஆழ்த்திய செப்டம்பர் 11 தாக்குதல்

கடந்த 2001 செப்டம்பர் 11-ஆம் தேதி, ஒசாமா பின்லேடனின் அல்-காய்தா அமைப்பின் பயங்கரவாதிகள், அமெரிக்காவின் நியூயார்க் நகரில் உலக வர்த்தக மையத்தின் 110 மாடி இரட்டை கோபுரம் மீது விமானங்களை மோதி தாக்குதல் நடத்திய சம்பவம் நிகழ்ந்து இன்றுடன் 17 ஆண்டுகள் ஆகிவிட்டன.

2001-ல் இதே நாளில் காலை 8:45-க்கு உலக வர்த்தக மையக் கட்டிடத்தின் வடக்குக் கோபுரக் கட்டிடத்தின் மீது ’பிளைட்-11’ விமானம் மோதியது இதனைத்தொடர்ந்து சரியாக 18 நிமிடங்களில் தெற்குக் கோபுரக் கட்டிடத்தின் மீது மற்றொரு விமானம் மோதியது.

அப்போதுதான் அது பயங்கரவாதத் தாக்குதல் என்பது பலருக்கும் தெரியவந்தது. மற்றொரு விமானம் காலை 9:45-க்கு பென்டகன் மீது மோதியது. கடத்தப்பட்ட 4-வது விமானம் பென்சில்வேனியா அருகில் ஒரு விவசாய நிலத்தில் விழுந்தது.

கடத்தல்காரர்களுடன் பயணிகள் நடத்திய போராட்டத்தின் முடிவில் விமானம் தரையில் விழுந்தது என்று பின்னர் தெரியவந்தது. அனைத்துச் சம்பவங்களிலும் மொத்தம், 2,996 பேர் உயிரிழந்தனர்.