கரைதுறைப்பற்று பிரதேச புதுவருட விற்பனை சந்தை!

உள்ளூர் உற்பத்திகளை ஊக்குவிக்கும் முகமாக சமுர்த்தி அபிவிருத்தி திணைக்களம், வடமாகாண தொழிற்துறை திணைக்களம் மற்றும் சிறுதொழில் முயற்சி அபிவிருத்தி பிரிவு ஆகியன இணைந்து நடாத்தும் கரைதுறைப்பற்று பிரதேச புதுவருட விற்பனை சந்தை மற்றும் கண்காட்சி மாவட்ட செயலகத்தின் அருகில் அமைந்துள்ள முல்லை பட்டனச் சந்தி திடலில் இன்று(07) காலை 10.00மணிக்கு ஆரம்பித்து வைக்கப்பட்டது. 

 கரைதுறைப்பற்று பிரதேச செயலாளர் ம.உமாமகள் தலைமையில் இடம்பெற்ற இந் நிகழ்வில் மாவட்ட அரசாங்க அதிபர் க.விமலநாதன் பிரதம அதிதியாக கலந்து கொண்டு குறித்த புதுவருட விற்பனை சந்தையினை ஆரம்பித்து வைத்தார். தொடர்ந்து கலந்து கொண்ட அதிதிகள் மற்றும் பொதுமக்கள் விற்பனை மற்றும் கண்காட்சி கூடங்களை பார்வையிட்டு பொருட்கொள்வனவில் ஆர்வத்துடன் ஈடுபட்டிருந்தமையை அவதானிக்க முடிந்தது. நேற்றும் (07) இன்றும்(08) இடம்பெறவுள்ள குறித்த விற்பனை சந்தையில் 56 உள்ளூர் உற்பத்தியாளர்களின் உற்பத்திக் கூடங்கள் அமைக்கப்பட்டுள்ளன. 

 புத்தாண்டை மையமாக வைத்து உள்ளூர் உற்பத்திகளின் சந்தை வாய்ப்புக்களை, உற்பத்திகளை பரவச்செய்வதே இதனுடைய நோக்கமாகும். குறித்த புதுவருட விற்பனை சந்தையானது முல்லைத்தீவு மாவட்டத்தின் ஆறு பிரதேச செயலர் பிரிவுகளிலும் ஏற்பாடு செய்யப்பட்டுள்ளமை குறிப்பிடத்தக்கது. இந் நிகழ்வில் மேலதிக அரசாங்க அதிபர்கள்(காணி மற்றும் நிர்வாகம்), மாவட்ட செயலக பதவிநிலை உத்தியோகத்தர்கள், கரைதுறைப்பற்று பிரதேச செயலக பதவிநிலை உத்தியோகத்தர்கள், உள்ளூர் உற்பத்தியாளர்கள், உத்தியோகத்தர்கள் மற்றும் பொதுமக்கள் என பலவேறு தரப்பினரும் கலந்து கொண்டிருந்தனர்.