நீதிவானை பாராளுமன்றில் விமர்சிக்க முடியாது!- அமைச்சர் ரிஷாத் பதியுதீனுக்கு அரசதரப்பு எம்.பி எச்சரிக்கை

மன்னார் மாவட்ட நீதிபதி குறித்து அமைச்சர் ரிஷாத் பதியுதீன் நேற்று சபையில் உரையாற்றியபோது, நாடாளுமன்ற நிலையியற் கட்டளையின்படி நீதித்துறை அதிகாரியொருவரின் நடத்தை குறித்து நாடாளுமன்றத்தில் பேச முடியாது என அரசதரப்பு எம்.பி ஜனக பண்டார எச்சரித்தார்.

மன்னார் மாவட்ட நீதிபதி மீதான குற்றச்சாட்டுகள் குறித்து அமைச்சர் ரிஷாத் பதியுதீன் நேற்று நாடாளுமன்றத்தில் உரையாற்றியவேளை, சபைக்கு தலைமை தாங்கிய பாராளுமன்ற உறுப்பினர் ஜனக பண்டார மேற்கண்டவாறு எச்சரித்தார்.
ஜனக பண்டார முன்னாள் நீதிபதியாவார் என்பது குறிப்பிடத்தக்கது.
அமைச்சரை நாடாளுமன்ற உறுப்பினர் ஜனக பண்டார பல தடவை எச்சரித்தார். எனினும் தான் நீதித்துறை அதிகாரிகளை மதிப்பதாக கூறினார்.
ஆனால், எந்தவொரு நபரும் தீர்ப்பொன்று குறித்து திருப்தியடையாவிட்டால் அதைவிட உயர்ந்த நீதிமன்றத்திடம் மேன்முறையீடு செய்யலாம் எனவும் அவர் கூறினார்.
மன்னார் சம்பவம் குறித்து அமைச்சர் பேசிய அனைத்தையும் ஹன்சார்ட்டிலிருந்து நீக்குவதாக சபைக்குத் தலைமை தாங்கிய ஜனக பண்டார அறிவித்தார்.