பள்ளத்தாக்கில் வீழ்ந்தது பஸ்; 30 பேர் பலி (வீடியோ)

தாய்லாந்தின் வட பகுதியில் இடம்பெற்ற பஸ் விபத்தொன்றில் 30 பேர் உயிரிழந்துள்ளதுடன் 22 பேர் காயமடைந்திருப்பதாக அந்நாட்டு அதிகாரிகள் செய்தி வௌியிட்டுள்ளனர்.

இந்த விபத்து திங்கட்கிழமை இரவு, டாக் பிராந்தியத்தில் இடம்பெற்றுள்ளது.

மலைப் பகுதியில் பயணித்துக்கொண்டிருந்த பஸ், கார் ஒன்றை முந்திச்செல்ல முற்பட்டபோது விபத்துக்குள்ளாகி பள்ளத்தாக்கில் வீழ்ந்துள்ளதாக அதிகாரிகள் தெரிவித்துள்ளனர்.

உள்ளூர் அரச ஊழியர்களை ஏற்றிக்கொண்டு பயணித்துக்கொண்டிருந்தபோதே விபத்து நேர்ந்துள்ளது.

காயமடைந்தவர்களில் குழந்தை ஒன்றும் அடங்குவதாகத் தெரிவிக்கப்பட்டுள்ளது.

பஸ்ஸின் வேகத்தடுப்பு கட்டுப்பாட்டில் இல்லாமற்போனதால் விபத்து நேர்ந்ததாக காயங்களுக்குள்ளாகி உயிர் தப்பித்த பஸ்ஸின் சாரதி தெரிவித்துள்ளார்.

குறித்த பகுதியில் ஏற்கனவே பல விபத்துக்கள் இடம்பெற்றுள்ளதாகவும் சுட்டிக்காட்டப்பட்டுள்ளது.