முதலாவது ஹஜ் குழு இன்று பயணம்...

புனித ஹஜ் கடமைக்கான முதலாவது தொகுதி ஹாஜிகளை ஏற்றிய சிறிலங்கன் எயார் விமானம் இன்று செவ்வாய்க்கிழமை (25) பிற்பகல் 2.15 மணிக்கு பண்டாரநாயக்க சர்வதேச விமான நிலையத்திலிருந்து சவூதி அரேபியாவின் ஜித்தா விமான நிலையத்தை நோக்கி பயண மாகவுள்ளதாக முஸ்லிம் சமய பண்பாட்டலுவல்கள் திணைக்களப் பணிப்பாளர் எம்.எச்.எம்.ஸமீல் தெரிவித்தார். முதலாவது தொகுதியில் சுமார் 217 ஹாஜிகள் மக்கா பயணிக்கவுள்ளனர்.

இவர்களை உத்தியோக பூர்வமாக வழியனுப்பி வைக்கும் வைபவம் இன்று காலை 11.00 மணிக்கு விமான நிலையத்தில் இடம்பெறவுள்ளது. இதன்போது இலங்கைக்கான சவுதி அரேபியாவின் தூதுவர் கவுன்சிலர் உள்ளிட்ட அதிகாரிகள், முஸ்லிம் சமய விவகார அமைச்சு மற்றும் திணைக்கள உயர் அதிகாரிகள், ஹஜ்முகவர்கள், ஹஜ் குழு அங்கத்தவர்கள் உள்ளிட்டோர் கலந்து கொள்ளவுள்ளனர்.

எதிர்வரும் செப்டம்பர் மாதம் 17 ஆம் திகதி வரை ஹாஜிகளின் விமான சேவை இடம்பெறும். இலங்கையிலிருந்து சுமார் 2240 ஹாஜிகள் இம்முறை புனித ஹஜ் கடமையை நிறைவேற்ற மக்கா செல்லவுள்ளமை குறிப்பிடத்தக்கது.