துடுப்பாட்ட செய்தி விளாசிய குணதிலகா.. அசத்திய டில்ஷான், திரிமன்னே: நியூசிலாந்துக்கு பதிலடி கொடுத்தது இலங்கை

நியூசிலாந்து அணிக்கு எதிரான 3வது ஒருநாள் போட்டியில் இலங்கை அணி 8 விக்கெட்டுகள் வித்தியாசத்தில் அசத்தல் வெற்றி பெற்றுள்ளது.
இலங்கை- நியூசிலாந்து அணிகளுக்கு இடையேயான 3வது ஒருநாள் போட்டி இன்று நெல்சனில் நடந்தது.

இதில் நாணய சுழற்சியில் வென்ற நியூசிலாந்து அணி முதலில் துடுப்பெடுத்தாடியது.

தொடக்க வீரர்கள் குப்தில் (30), டாம் லாதம் (42) சிறப்பான தொடக்க கொடுத்தனர்.

ரோஸ் டெய்லர் டக்- அவுட்டாக வெளியேறி ஏமாற்றம் அளித்தார். நிசோலஸ் (20) நிலைக்கவில்லை.

நிதானமாக விளையாடிய அணித்தலைவர் வில்லியம்சன் (59) அரைசதம் கடந்து ஆட்டமிழந்தார்.

ரொஞ்சி 7 ஓட்டங்களில் ஆட்டமிழக்க, சாண்ட்னர் (38), பிரேஸ்வெல் (30) கடைசி நேரத்தில் அணியின் ஓட்டங்களை உயர்த்தினர்.

இதனால் நியூசிலாந்து அணி 50 ஓவர்கள் முடிவில் 8 விக்கெட் இழப்பிற்கு 276 ஓட்டங்கள் எடுத்தது.

நுவன் பிரதீப், சமீரா, வந்தர்சே தலா 2 விக்கெட்டுகளை கைப்பற்றினர்.

பின்னர் 277 ஓட்டங்கள் எடுத்தால் வெற்றி என களமிறங்கிய இலங்கை அணிக்கு டில்ஷான், குணதிலகா தொடக்க வீரர்களாக களமிறங்கினர்.

குணதிலகா அதிரடி ஆட்டத்தை தொடர்ந்தார். இதனால் அவர் 45 பந்தில் 65 ஓட்டங்கள் (7 பவுண்டரி, 4 சிக்சர்) குவித்து ஆட்டமிழந்தார்.

மறுமுனையில் நிதானமாக ஆடிய டில்ஷான் சதத்தை நெருங்கினார். அவர் 91 ஓட்டங்கள் எடுத்திருந்த போது துரதிருஷ்டவசமாக ஓட்ட முறையில் ஆட்டமிழந்தார்,

பின்னர் களமிறங்கிய திரிமன்னே மற்றும் சந்திமால் பொறுமையாக ஆடி அணியை வெற்றி பெற வைத்தனர்.

இதனால் இலங்கை அணி 22 பந்துகள் மீதமுள்ள நிலையில் 277 ஓட்டங்கள் எடுத்து 8 விக்கெட் வித்தியாசத்தில் அசத்தல் வெற்றி பெற்றது,

திரிமன்னே 87 ஓட்டங்களுடனும், சந்திமால் 27 ஓட்டங்களுடனும் ஆட்டமிழக்காமல் இருந்தனர்.

முதல் 2 ஒருநாள் போட்டிகளில் மோசமான தோல்வியடைந்த இலங்கை அணிக்கு இந்த வெற்றி சிறப்பானதாக அமைந்துள்ளது.

இருப்பினும் 5 ஒருநாள் போட்டிகள் கொண்ட தொடரில் இலங்கை 1-2 என பின் தங்கியுள்ளது.