போராட்டக்காரர்களுக்கு எதிரான வன்முறை தேவையற்றது – ஐரோப்பிய ஒன்றியம்

இலங்கை அரசாங்கம் தனது GSP+ உறுதிமொழிகளுக்கு முழுமையாக இணங்கி செயற்படும் என எதிர்பார்ப்பதாக ஐரோப்பிய ஒன்றிய சபை தெரிவித்துள்ளது. ஜனநாயக விழுமியங்களுக்கு முழு மதிப்பளித்து, மேலும் ஸ்திரத்தன்மை, பொருளாதார மீட்சி மற்றும் நல்லிணக்க நிகழ்ச்சி நிரலை முன்னெடுப்பதை இலக்காகக் கொண்டு, இலங்கை மக்களுக்கு ஆதரவான அனைத்து முயற்சிகளுக்கும் ஆதரவளிப்பதாகவும் ஐரோப்பிய ஒன்றியம் உறுதியளித்தது. நேற்று காலை காலி முகத்திடலில் பாதுகாப்புப் படையினர் தாக்குதல் நடத்தியதை அடுத்து அறிக்கை ஒன்றை வெளியிட்ட ஐரோப்பிய ஒன்றியம், ஜனநாயக, அமைதியான மற்றும் ஒழுங்கான மாற்றத்தில் இலங்கை பிரஜைகளின் கருத்து சுதந்திரம் மற்றும் தனிப்பட்ட உரிமைகளை நிலைநாட்டுமாறு அரசாங்கத்திடம் கோரியுள்ளது. நேற்று போராட்டக்காரர்கள் மீது நடத்தப்பட்ட வன்முறை தேவையற்றது என அது மீண்டும் வலியுறுத்தியுள்ளது. 

 ஐரோப்பிய ஒன்றியம் அமைதியான ஒன்றுகூடல் மற்றும் சங்கத்தின் சுதந்திரத்திற்கான உரிமையின் முக்கியத்துவத்தை வலியுறுத்தியுள்ளதுடன், அமைதியான ஆர்ப்பாட்டக்காரர்களுக்கு எதிராக தேவையற்ற சக்தியைப் பயன்படுத்துவதையும் கண்டித்துள்ளது. நாட்டின் பொருளாதாரத்தை மீண்டும் ஒரு நிலையான பாதையில் கொண்டு செல்வதற்காக சீர்திருத்தங்களின் கட்டமைக்கப்பட்ட திட்டத்தை விரைவாக நிறுவுதல் மற்றும் செயற்படுத்துதல் ஆகியவற்றின் அவசியத்தையும் அது சுட்டிக்காட்டியது. 

 நல்லாட்சி மற்றும் நல்லிணக்க முயற்சிகளை ஊக்குவிக்கும் அதேவேளையில் மனித உரிமைகள் மற்றும் சட்டத்தின் ஆட்சியைப் பாதுகாக்கவும் அதிகாரிகளுக்கு அழைப்பு விடுக்கப்பட்டுள்ளது. ஐரோப்பிய ஒன்றியம் இலங்கை மக்களுக்கு பல வருடங்களாக 1 பில்லியன் யூரோவிற்கும் அதிகமான உதவிகளை வழங்கியுள்ளதாக நினைவு கூர்ந்துள்ளது. 2017 இல் ஐரோப்பிய ஒற்றைச் சந்தைக்கான முன்னுரிமை அணுகலை GSP+ திட்டத்தின் கீழ் மீண்டும் அறிமுகப்படுத்துவது இலங்கையின் பொருளாதார வளர்ச்சிக்கு இன்றியமையாதது என்றும் அது தெரிவித்துள்ளது.