படகு மூலம் இந்தியாவுக்கு ரூ 5000 இல் பயணம்

இந்தியாவுக்கும் இலங்கைக்கும் இடையிலான பயணிகள் படகு சேவை அடுத்த மாதம் (ஜனவரி) முதல் ஆரம்பிக்கப்படவுள்ளதாக இந்திய ஊடகங்கள் தெரிவிக்கின்றன. இந்த பயணிகள் படகுகள் யாழ் மாவட்டத்தில் உள்ள காங்கேசன்துறை துறைமுகத்தில் இருந்து இந்தியாவின் புதுச்சேரிக்கு பயணிக்க உள்ளது . இந்த படகு சேவைக்கு இந்திய அரசாங்கம் விருப்பம் தெரிவித்துள்ளதாக துறைமுகங்கள் மற்றும் கப்பல் போக்குவரத்து அமைச்சர் நிமல் சிறிபால டி சில்வா தெரிவித்துள்ளார் . இந்த பயணிகள் கப்பல் சேவையானது சுற்றுலாத் துறையை மேம்படுத்தவும், இரு நாடுகளுக்கு இடையேயான கலாச்சார உறவுகளை வலுப்படுத்தவும் உதவும் என எதிர்பார்க்கப்படுகிறது . 

 இரு நாடுகளுக்கும் இடையேயான தொடர்பை மேம்படுத்த பல கோரிக்கைகளை கருத்தில் கொண்டு இந்த பயணிகள் படகு சேவை தொடங்கப்படவுள்ளது. எதிர்காலத்தில் தென்னிந்தியாவில் இருந்து திருகோணமலை மற்றும் இலங்கையில் கொழும்புக்கு சேவைகளை ஆரம்பிப்பது தொடர்பில் இலங்கை அரசாங்கம் கவனம் செலுத்தி வருகின்றது. இந்த பயணிகள் படகுகள் இந்தியாவின் புதுச்சேரிக்கு பயணம் செய்ய சுமார் மூன்றரை மணி நேரம் ஆகும் மற்றும் ஒரு பயணத்திற்கு முந்நூறு (300) முதல் நானூறு (400) பயணிகளை ஏற்றிச் செல்லும். ஒரு பயணத்திற்கு ஒரு பயணிக்கு 5000 ரூபாய்க்கு இணையான கட்டணம் வசூலிக்க முன்மொழியப்பட்டுள்ளது, மேலும் ஒரு பயணி 100 கிலோ வரையிலான சாமான்களை எடுத்துச் செல்லலாம் என்றும் பரிந்துரைக்கப்பட்டுள்ளது.