இதுதானா தாய் மனசு ? {கவிதை}

அம்மா என்னை மன்னித்து விடு 

சீராட்டி,பாராட்டி,சோறூட்டி வளர்த்த -உன்னை 

ஒரு பிடி சோறூட்டி பார்க்க முடியாத 

வக்கத்த பயலாய் நானிருக்கிறேன் ..........

உன் போன்ற அம்மாக்கள் 

தாய்ப்பாலில் உசிர் கலந்து ஊட்டிய போதும் 

என் போன்ற பிள்ளைகள்-நன்றி 

மறந்து நிற்கின்றோமே மன்னிப்பாயா?

நீ செய்த தியாகங்கள் 

நானறிந்த போதும் கூட 

நன்றிகெட்ட மகனாய்த் தானே

இன்னும் நான் ... .மன்னிப்பாயா?

பக்கத்தில் இருந்த போதும் .

பாவியாய் தானிருந்தேன் 

தூரத்தில் இருக்கின்றேன் 

துடிக்குதம்மா மனசு.. மன்னிப்பாயா?

என்னைப்போல் எத்தனைபேர் 

வாய் பேச முடியாதவராய் -பாழ் பட்ட 

உலகத்தில் வாழத்தான் செய்கின்றனரோ 

உன்னைப்போல் தாய் மனசை புண்படுத்தி'..............

நன்றி கெட்ட உலகத்தில் 

நானிருந்து என்னபயன் என்றெண்ணி 

வாழ்வுதனை முடித்து விட -முயலுகிற 

போதினிலும்  நீவந்து தடுக்கின்றாய் ....

இதுதானா தாய் மனசு ?

              

இன்னுமொரு முறை பிறப்பது 

நிஜமென்று இருந்து விட்டால் -நானுனக்கு 

தாயாக வரவேண்டும்- அதுவரை 

என்னை மன்னிப்பாயா?.   

                             

                   *சந்துரு*