மன்னார் நகர சபையின் 2015 ஆம் ஆண்டின் வரவு,செலவுத்திட்டம் மக்களின் பார்வைக்காக.

மன்னார் நகர சபையின் 2015 ஆம் ஆண்டிற்கான வரவு செலவுத்திட்டம் மக்களின் பார்வைக்காக மன்னார் நகர சபையில் காட்சிப்படுத்தப்பட்டுள்ளதாக மன்னார் நகர சபை உறுப்பினர் இரட்ணசிங்கம் குமரேஸ் தெரிவித்தார்.

மன்னார் நகர சபையின் விசேட கூட்டம் கடந்த 3 ஆம் திகதி இடம் பெற்றது.குறித்த கூட்டத்தில் மன்னார் நகர சபை தலைவர் எஸ்.ஞானப்பிரகாசம்,உப தலைவர் ஜேம்ஸ் ஜேசுதாஸ்,நகர சபை செயலாளர் எஸ்.எல்.றொனால்ட் மற்றும் நகர சபை உறுப்பினர்களான எஸ்.பிருந்தாவனநாதன்,ஏ.சி.மெரினஸ் பெரேரா ஆகியோரும் கலந்து கொண்டிருந்தனர்.

குறித்த கூட்டத்தின் போது நகர சபை தலைவர் 2015 ஆம் ஆண்டுக்கான வரவு செலவு திட்டத்தின் 1 ஆம் வாசிப்பினை முன்வைத்தார்.இதனையடுத்து சபை உறுப்பினர்களினால் வரவு செலவு திட்டம் தொடர்பாக விவாதிக்கப்பட்டு ஏகமனதாக ஏற்றுக்கொள்ளப்பட்டதுடன் இவ் வரவு செலவுத்திட்டம் மக்களின் பார்வைக்காக வைக்கப்பட்டுள்ளதுடன் குறித்த வரவு செலவுத்திட்டத்தை அலுவலக நேரங்களில் மக்கள் பார்வையிடுவதற்கான ஏற்பாடுகளும் மேற்கொள்ளப்பட்டுள்ளதாக அவர் தெரிவித்தார்.

மேலும் வரவு செலவுத்திட்டத்தில் 2015 ஆம் ஆண்டுக்கான மொத்த வருமானமாக 91,088,280.00 ரூபாவும்,மொத்தச் செலவீனமாக 91,086,780.00 ரூபாவும் மிகையாக 1,500.00 ரூபாய் எனவும் மதிப்பீடு செய்யப்பட்டுள்ளது.

அத்துடன் சபையின் மொத்த மீண்டுவரும் செலவினத்தில் நிர்வாக செலவினத்திற்காக 43,379,280.00ரூபாவும்,சுகாதார சேவைகளுக்காக 1,480,000.00 ரூபாவும்,பௌதீக திட்டமிடலுக்காக 24,340,700.00 ரூபாவும்,தண்ணீர் சேவைகளுக்காக 125,000.00 ரூபாவும்,பொதுப் பயண்பாட்டு சேவைகளுக்காக 3,752,800.00ரூபாய்,நலன்புரிச் சேவைகளுக்hக 525,500.00 ரூபாய் மற்றும் மூலதன செலவினங்களுக்காக 27,595,000.00 ரூபாய் ஒதுக்கீடு செய்யப்பட்டுள்ளதாகவும் இறுதி தீர்மானம் எதிர்வரும் 15 ஆம் திகதி இடம் பெறும் சபை கூட்டத்தில் நிறைவேற்றப்படும் என மன்னார் நகர சபை உறுப்பினர் இரட்ணசிங்கம் குமரேஸ் மேலும் தெரிவித்தார்.