தேசிய அரசின் முதலாவது வரவு–செலவுத் திட்டம் இன்று....

நல்லாட்சி அரசாங்கத்தின் 2016 ஆம் நிதி ஆண்டுக்கான வரவு செலவுத் திட்டம் இன்று பாராளுமன்றத்தில் சமர்ப்பிக்கப்படுகின்றது.

நாட்டு மக்களின் பாரிய எதிர்பார்ப்பினை ஏற்படுத்தியிருக்கின்ற இவ்வரவு செலவுத் திட்டத்தை நிதியமைச்சர் ரவி கருணாநாயக்க இன்று வெள்ளிக்கிழமை பிற்பகல் 2.15 மணியளவில் சமர்ப்பிக்கவுள்ளார்.

பாராளுமன்றம் இன்று பிற்பகல் 2 மணிக்கு சபாநாயகர் கருஜயசூரிய தலைமையில் கூடுகிறது.

இன்றைய தினத்தின் அமர்வுகளின் போது ஏனைய செயற்பாடுகள் தவிர்க்கப்பட்டு வரவு செலவுத் திட்டத்திற்கு முன்னுரிமையளிக்கப்பட்டுள்ளது. அந்த வகையில் இன்றைய தினம் 2016 ஆம் ஆண்டுக்கான நிதி ஒதுக்கீட்டு பிரேரணையாக வரவு செலவுத் திட்டம் சபையின் அங்கீகாரத்திற்காக சமர்பிக்கப்படவுள்ளது.

ஜனாதிபதி மைத்திரிபால சிறிசேன மற்றும் பிரதமர் ரணில் விக்கிரமசிங்க ஆகியோரின் தலைமையில் அமைந்துள்ள நல்லாட்சி அரசாங்கத்தின் முதலாவது வரவு செலவுத் திட்டமாகவும் ஐக்கிய தேசியக் கட்சி மற்றும் ஸ்ரீலங்கா சுதந்திரக் கட்சி ஆகிய இரு பெரும் தேசியக் கட்சிகள் இணைந்து சமர்ப்பிக்கின்ற வரவு செலவுத் திட்டமாகவும் இது அமைந்துள்ளது.

ஜனாதிபதி மைத்திரிபால சிறிசேன வெற்றி பெற்றதன் பின்னர் ஸ்தாபிக்கப்பட்ட 100 நாள் அரசாங்கத்தினால் கடந்த ஜனவரி மாதம் 29 ஆம் திகதி முன்வைக்கப்பட்ட வரவு செலவத் திட்டமானது இடைக்கால வரவு செலவுத் திட்டமாகவே கணிக்கப்பட்டுள்ளது.

இந்நிலையில் 2016 ஆம் நிதியாண்டுக்கென அரசாங்கத்தின் மொத்த செலவினமாக ஒரு இலட்சத்து 94 ஆயிரத்து 145 கோடியே நான்கு இலட்சத்து 24 ஆயிரம் ரூபா மதிப்பிடப்பட்டுள்ளது. இந்த நிதித் தொகையினைக் பாராளுமன்றத்தில் அங்கீகரித்துக் கொள்ளும் அடிப்படையில் இன்று நிதி அமைச்சரினால் இரண்டாம் வாசிப்பாக வரவு செலவுத்திட்டம் முன்வைக்கப்படவுள்ளது.

2016 ஆம் நிதி ஆண்டுக்கான வரவு செலவுத் திட்டம் தொடர்பான அறிவித்தலை நிதியமைச்சர் முதலாம் வாசிப்பாக ஒக்டோபர் மாதம் 23 ஆம் திகதி பாராளுமன்றத்தில் ஆற்றுப்படுத்தியிருந்தார் என்பது குறிப்பிடத்தக்கதாகும்.

வழமை போன்றே 2016 ஆம் நிதியாண்டிலும் பாதுகாப்பு அமைச்சுக்கென பெருமளவிலான நிதி ஒதுக்குவதற்கு தீர்மானிக்கப்பட்டுள்ளது. அந்த வகையில் அடுத்த வருட பாதுகாப்பு அமைச்சின் செலவினமாக 30 ஆயிரத்து 665 கோடியே 78 இலட்சத்து 24 ஆயிரம் ரூபாவை ஒதுக்கீடு செய்வதற்கு உத்தேசிக்கப்பட்டுள்ளது.

இதேவேளை நல்லாட்சி அரசாங்கத்தில் முன்வைக்கப்படுகின்ற 2016 ஆம் நிதியாண்டுக்கான வரவு செலவுத் திட்டத்தில் அத்தியாவசியப் பொருட்களுக்கான விலைக்குறைப்புக்கு தாராளமயம் காட்டப்பட்டிருப்பதாகவும் அதிகமான நிவாரணங்கள் வழங்கப்பட விருப்பதாகவும் தெரிவிக்கப்படுகிறது. நிதியமைச்சர் ரவி கருணாநாயக்கவும் இதனைக் குறிப்பிட்டுள்ளார்.

நாட்டு மக்கள் எதிர்பார்த்திருக்கும் நிவாரணங்கள் சம்பள அதிகரிப்புக்கான பரிந்துரைகள் முன்வைக்கப்படலாம் என்றும் நம்பப்படுகிறது. வரி விதிப்புகளைப் பொறுத்த வரையில் ஆடம்பரப் பொருட்களுக்கான வரிகளின் அதிகரிப்போ அல்லது புதிய வரி அறிமுகமோ இடம்பெறலாம் என்றும் எதிர்பார்க்கப்படுகின்றது.

2016 ஆம் நிதியாண்டுக்கான நிதி ஒதுக்கீட்டு சட்டமூலத்தின் பிரகாரம் அடுத்த நிதியாண்டில் ஒவ்வொரு அமைச்சுக்குமான செலவின மதிப்பீடுகள் பின்வருமாறு,

புத்தசாசன அமைச்சு 133,76,65,000 ரூபா,
நிதி அமைச்சு 10,783,32,35,000 ரூபா,
பாதுகாப்பு அமைச்சு 30,665,78,24,000 ரூபா,
தேசிய கொள்கைகள் மற்றும் பொருளாதார அலுவல்கள் அமைச்சு 1,219,23,50,000 ரூபா,
அனர்த்த முகாமைத்துவ அமைச்சு 293,37,50,000 ரூபா,
அஞ்சல், அஞ்சல் சேவைகள் மற்றும் முஸ்லிம் சமய அலுவல்கள் அமைச்சு 1,258,66,50,000 ரூபா,
நீதி அமைச்சு 988,47,60,000 ரூபா, சுகாதாரம் மற்றும் சுதேச மருத்துவ அமைச்சு 17,407,79,98,000 ரூபா,
வெளிநாட்டலுவல்கள் அமைச்சு 946,92,05,000 ரூபா,
போக்குவரத்து அமைச்சு 5953,06,50,000 ரூபா,
பல்கலைக்கழக கல்வி மற்றும் நெடுஞ்சாலைகள் அமைச்சு 17,141,98,80,000 ரூபா,
கமத்தொழில் அமைச்சு 5,420,12,12,000 ரூபா,
மின்வலு மற்றும் புதுப்பிக்கத்தக்க சக்தி அமைச்சு 123,74,00,000 ரூபா,
மகளிர் மற்றும் சிறுவர் அலுவல்கள் அமைச்சு 976,61,55,000 ரூபா,
உள்நாட்டலுவல்கள் அமைச்சு 3,263,80,00,000 ரூபா,
பாராளுமன்ற மறுசீரமைப்பு மற்றும் வெகுசன ஊடக அமைச்சு 545,44,80,000 ரூபா,
வீடமைப்பு மற்றும் நிர்மாணத்துறை அமைச்சு 282,34,00,000 ரூபா, சமூக வலுவூட்டல் மற்றும் நலன்புரி அமைச்சு 6,840,08,82,000 ரூபா, கல்வி அமைச்சு 18,597,60,30,000 ரூபா, பொது நிர்வாக மற்றும் முகாமைத்துவ அமைச்சு 15,625,61,25,000 ரூபா, பெருந்தோட்டக் கைத்தொழில் அமைச்சு 787,87,80,000 ரூபா, விளையாட்டுத்துறை அமைச்சு 332,11,00,000 ரூபா,
மலைநாட்டு புதிய கிராமங்கள் உட்கட்டமைப்பு வசதிகள் மற்றும் சமுதாய அபிவிருத்தி அமைச்சு 68,68,00,000 ரூபா,
புனர்வாழ்வளிப்பு மீள்குடியேற்றம் மற்றும் இந்து சமய அலுவல்கள் அமைச்சு 378,01,30,000 ரூபா,
கைத்தொழில் மற்றும் வாணிப அலுவல்கள் அமைச்சு 567,51,80,000 ரூபா,
பெற்றோலிய வளங்கள் அபிவிருத்தி அமைச்சு 28,15,00,000 ரூபா,
கடற்றொழில் மற்றும் நீர்வாழ் வளங்கள் அபிவிருத்தி அமைச்சு 493,30,45,000 ரூபா,
காணி அமைச்சு 780,07,74,000 ரூபா, கிராமிய பொருளாதார அலுவல்கள் அமைச்சு 480,04,85,000 ரூபா,
மாகாண சபைகள் மற்றும் உள்ளூராட்சி அமைச்சு 23,793,46,42,000 ரூபா,
தேசிய கலந்துரையாடல்கள் அமைச்சு 79,08,15,000ரூபா,
அரச தொழில் முயற்சிகள் அபிவிருத்தி அமைச்சு 36,12,30,000 ரூபா,
சுற்றுலாத்துறை அபிவிருத்தி மற்றும் கிறிஸ்தவ சமய அலுவல்கள் அமைச்சு 16,28,00,000 ரூபா,
மகாவலி அபிவிருத்தி மற்றும் சுற்றாடல் அமைச்சு 6,949,58,07,000 ரூபா,
வலுவாதார அபிவிருத்தி மற்றும் வன ஜீவராசிகள் அமைச்சு – 314,63,30,000 ரூபா,
மாநகர மற்றும் மேல் மாகாண அபிவிருத்தி அமைச்சு – 2,227,51,000 ரூபா,
உள்ளக அலுவல்கள், வடமேல் அபிவிருத்தி மற்றும் கலாசார அலுவல்கள் அமைச்சு- 615,12,28,000 ரூபா,
தென்மாகாண அபிவிருத்தி அமைச்சு-11,39,20,000 ரூபா,
தேசிய நல்லிணக்க மற்றும் ஒருமைப்பாட்டு அமைச்சு – 10,04,20,000 ரூபா,
நகரத்திட்டமிடல் மற்றும் நீர்வழங்கல் அமைச்சு- 3,197,80,06,000 ரூபா,
துறைமுகங்கள் மற்றும் கப்பற்துறை அலுவல்கள் அமைச்சு- 69,06,00,000 ரூபா, வெளிநாட்டு தொழில்வாய்ப்பு அமைச்சு- 103,70,50,000 ரூபா,
சட்டமும் ஒழுங்கும் மற்றும் சிறைச்சாலைகள் மறுசீரமைப்பு அமைச்சு- 7,692,58,50,000 ரூபா,
தொழில் மற்றும் தொழிற்சங்க உறவுகள் அமைச்சு- 707, 56, 20,000 ரூபா, தொலைத்தொடர்புகள் மற்றும் டிஜிட்டல் உட்கட்டமைப்பு வசதிகள் அமைச்சு-42, 68,00,000 ரூபா,
அபிவிருத்தி மற்றும் சர்வதேச வர்த்தக அமைச்சு-81,45,55,000 ரூபா,
விஞ்ஞான, தொழில்நுட்ப மற்றும் ஆராய்ச்சி அமைச்சு-386,85,50,000 ரூபா, திறன்கள் அபிவிருத்தி மற்றும் தொழில் பயிற்சி அமைச்சு-1,366,11,30,000 ரூபா, நீர்ப்பாசன மற்றும் நீரக வளமூல முகாமைத்துவ அமைச்சு-2,807,83,25,000, ரூபா, ஆரம்பக் கைத்தொழில் அமைச்சு 129,42, 40,000 ரூபா.