15 இந்திய மொழிகளில் வெளியான HOOTE செயலி-ரஜினிகாந்தின் மகளின் புதிய முயற்சி

கருத்து பரிமாற்றத்துக்காகவும், வீடியோ, புகைப்படங்களை போஸ்ட் செய்யவும் பேஸ்புக், ட்விட்டர், இன்ஸ்டாகிராம் யூடியூப் போன்றவை மக்களிடையே பயன்பாட்டில் இருந்து வருகின்றன. இந்தச் சூழலில் சமீபத்தில் ஆடியோவுக்கான சமூக வலைத்தளமாக கிளப் ஹவுஸ் அறிமுகம் செய்யப்பட்டது. இந்த புதிய செயலில் பயனர்கள் குழுமங்களாக இணைந்து உரையாடி வருகின்றனர். கிளப் ஹவுசுக்கு கிடைத்த ஏகோபித்த வரவேற்பைத் தொடர்ந்து ட்விட்டர் நிறுவனமும் ஸ்பேசஸ் என்ற வசதியை அறிமுகம் செய்தது. 

இந்நிலையில் தற்போது நடிகர் ரஜினிகாந்தின் (Rajinikanth) மகள் சவுந்தர்யா ஆம்டெக்ஸ் என்ற நிறுவனத்துடன் இணைந்து ஹூட் (HOOTE) என்ற பெயரில் ஆடியோவுக்கான சமூக வலைத்தள செயலியை தொடங்கி உள்ளார். இதனை நடிகர் ரஜினிகாந்த் நேற்று அறிமுகம் செய்து வைத்தார். இது தொடர்பான வீடியோவை ட்விட்டரில் பகிர்ந்துள்ள ரஜினிகாந்த், குரலை அடிப்படையாகக் கொண்ட சமூக வலைத்தளத்தை இந்தியாவில் இருந்து உலக மக்களுக்காக அறிமுகம் செய்வதாக குறிப்பிட்டு உள்ளார். மேலும் இந்தச் செயலியை அறிமுகம் செய்வதில் பெரு மகிழ்ச்சி அடைவதாகவும், இது மிகவும் பயனுள்ளதாக இருக்கும் எனவும் தெரிவித்துள்ளார்.