தேசிய உற்பத்தி திறனில் இரண்டாம் இடத்தைப் பெற்று மன்னார் மாவட்டச் செயலகம் வரலாற்றுச் சாதனை

 இன்று 08.11.2026 கொழும்பு, பண்டாரநாயக்க ஞாபகார்த்த சர்வதேச மாநாட்டு மண்டபத்தில் (BMICH) நடைபெற்ற தேசிய உற்பத்தித்திறன் விருதுகள் 2025/2026 வழங்கும் விழாவில், மன்னார் மாவட்டச் செயலகம் தேசிய மட்டத்தில் இரண்டாம் இடத்தைப் பெற்று வரலாற்றுச் சிறப்புமிக்க சாதனையைப் படைத்துள்ளது. உற்பத்தித்திறன் மேம்பாடு, நிறுவனச் சிறப்புத்துவம், நல்லாட்சி மற்றும் மக்களை மையப்படுத்திய அரச சேவை வழங்கல் ஆகிய துறைகளில் வெளிப்படுத்திய சிறந்த செயற்பாடுகளுக்கான அங்கீகாரமாக இவ்விருது வழங்கப்பட்டது.

​இம்மதிப்புமிக்க தேசிய விருதினை இலங்கை ஜனநாயக சோசலிசக் குடியரசின் அதிமேதகு ஜனாதிபதி அநுர குமார திசாநாயக்க அவர்கள் கலந்து கொண்ட நிகழ்வில் மன்னார் மாவட்டச் செயலாளர் திரு. க. கனகேஸ்வரன் அவர்கள், மாவட்டச் செயலகத்தின் ஏனைய உத்தியோகத்தர்களுடன் இணைந்து, மாவட்டச் செயலகத்தின் சார்பில் பெற்றுக்கொண்டார்.

​இச்சிறப்புமிக்க தேசிய சாதனையானது, மக்களை மையப்படுத்திய அரச நிர்வாகத்தை வலுப்படுத்துதல், பொதுச் சேவைகளின் தரத்தை உயர்த்துதல், நிறுவன வினைத்திறனை மேம்படுத்துதல், புத்தாக்கங்களை ஊக்குவித்தல் மற்றும் வெளிப்படைத்தன்மை, பொறுப்புக்கூறல், மக்களின் தேவைகளுக்கேற்ப விரைவாகச் செயற்படும் அரச சேவையை உறுதிப்படுத்துதல் ஆகியவற்றில் மாவட்டச் செயலகம் கொண்டிருந்த தொடர்ச்சியான அர்ப்பணிப்பைப் பிரதிபலித்தது.

​குறிப்பாக, 5S வேலைத்தள முகாமைத்துவம், ISO 9001:2015 தர முகாமைத்துவ முறைமை, டிஜிட்டல் மயமாக்கல் முயற்சிகள் மற்றும் தொடர்ச்சியான உற்பத்தித்திறன் மேம்பாட்டுத் திட்டங்கள் ஆகியவற்றின் வெற்றிகரமான நடைமுறைப்படுத்தல் இத்தேசிய அங்கீகாரத்தைப் பெறுவதில் முக்கிய பங்காற்றியது.

​மாவட்டச் செயலாளரின் தலைமைத்துவம் மற்றும் வழிகாட்டலின் கீழ், மாவட்டச் செயலகத்தின் அனைத்து உத்தியோகத்தர்களின் அர்ப்பணிப்பு, கடின உழைப்பு, ஒற்றுமை, குழுச் செயற்பாடு மற்றும் பெறுமதிமிக்க பங்களிப்புகள் ஆகியவற்றின் விளைவாக இம்மகத்தான சாதனை சாத்தியமானது.

​இத்தேசிய அங்கீகாரமானது, வினைத்திறன்மிக்க, புத்தாக்கம் நிறைந்த, மக்கள் நேயமிக்க மற்றும் சேவை நோக்குடைய அரச நிர்வாகத்தைக் கட்டியெழுப்புவதற்கான மன்னார் மாவட்டச் செயலகத்தின் தொடர்ச்சியான பயணத்தில் ஒரு முக்கிய மைல்கல்லாக அமைந்ததுடன், மன்னார் மாவட்டத்திற்கும் அதன் மக்களுக்கும் பெருமையையும் கௌரவத்தையும் பெற்றுத்தந்துள்ளது.

​