பிரதமருக்கு எதிராக நம்பிக்கையில்லா தீர்மானம்

 கல்வி மற்றும் உயர்கல்வி அமைச்சரும் பிரதமருமான கலாநிதி ஹரிணி அமரசூரியவுக்கு எதிராக நம்பிக்கையில்லா தீர்மானம் கொண்டு வர எதிர்க்கட்சி முடிவு செய்துள்ளது.

நாடாளுமன்றத்தில் நேற்று இடம்பெற்ற எதிர்க்கட்சித் தலைவர்கள் கூட்டத்தில் இந்த முடிவு எடுக்கப்பட்டது.

இதன்படி, இன்று (07 ஆம் திகதி) கையெழுத்து சேகரிப்பைத் தொடங்கவும் முடிவு செய்யப்பட்டுள்ளது.

கல்வி நடவடிக்கைகளை மேற்கொள்வதில் தன்னிச்சையான மற்றும் புரிந்துகொள்ள முடியாத நடத்தை மற்றும் தரம் 06 கல்வி முறை தொடர்பாக எழுந்துள்ள பிரச்சினை ஆகியவற்றின் அடிப்படையில் நம்பிக்கையில்லா தீர்மானத்தை கொண்டு வர முடிவு செய்யப்பட்டுள்ளது.

நேற்று முன்தினம் (05) நடைபெற்ற ஐக்கிய மக்கள் சக்தியின் நாடாளுமன்றக் குழுக் கூட்டத்தில் கல்வி அமைச்சருக்கு எதிரான நம்பிக்கையில்லாப் பிரேரணை முன்மொழியப்பட்டது.

பின்னர் எதிர்க்கட்சித் தலைவர் சஜித் பிரேமதாச தலைமையில் நடைபெற்ற எதிர்க்கட்சித் தலைவர்கள் கூட்டத்திலும் இந்தப் பிரேரணை சமர்ப்பிக்கப்பட்டது.

எதிர்க்கட்சியின் பிரதான அமைப்பாளர் கயந்த கருணாதிலக, இந்த முன்மொழிவுக்கு மற்ற எதிர்க்கட்சி அரசியல் கட்சிகள் தங்கள் ஆதரவைத் தெரிவித்துள்ளதாக தெரிவித்துள்ளார்.

அதன்படி, இன்று முதல் தீர்மானத்திற்கான கையொப்பங்களை சேகரிக்கத் தொடங்கவும், இந்த வாரத்திற்குள் நம்பிக்கையில்லாப் பிரேரணையை சபாநாயகரிடம் சமர்ப்பிக்கவும் முடிவு செய்யப்பட்டதாக எம்.பி. தெரிவித்தார்.